Agartala, Nohprah 15 :U President ka Tripura Pradesh Trinamool Congress, u Pijush Kanti Biswas ula phah da ka shithi sha u chairman jong ka Tripura Human Rights Commission ha kaba iadei bad ka jingpynkhein ia ki hok longbriew manbriew hapoh Tripura lyngba ki kam thombor jong ki pulit.
Ha katei ka shithi u Biswas ula thoh; “Nga pynpaw sha phi halor ka jingpynkhein ia ki hok longbriew manbriew hapoh ka sorbah Agartala ka Tripura kaba donkam ba phin shim ia ki sienjam.Ka sorkar ka la wan ha ka bor synshar ha ka jylla lyngba ki jingkut jingmut halor ka ioh kam ioh jam hapdeng ki samla ha ka snem 2018.Hynrei, ka jingpulom jong ka sorkar ban pynurlong ia kine ki jingkular kala wanrah ka jingsngewkhia kaba jur hapdeng ki samla khlem kam khlem jam.”
Da kaba pynshong nongrim halor ka jingbom lathi jong ki pulit pyrshah ia kito ki samla kiba la pyndep ia ka eksam na ka bynta ka Selection Test for Graduate Teachers (STGT), u Biswas ula ong; “Ha ka jingshisha ka jingpyndep ia ka eksam bad ka lynti ban pynrung kam kadei kaba hap ban pyndep hapoh ka hynriew bnai ha kaba la jan saw bnai kila kut noh bad ba sa kumba ar bnai ka jingpynlong ia kane ka eksam kan ym don jingmyntoi shuh.Ha kaba kum kane ka jinglong jingman, kine ki samla wad kam kila bteng ban dawa iala ki jong ki hok da kaba phaikhmat sha u Myntri ka tnat pule puthi ka jylla.”
Nalor kata katei ka shithi kala ong ruh ba ha ka 12 tarik mynta u bnai, kine ki samla kila pynlong ka jingiakhih kaba jai jai da kaba ialum lang shabar ka iingsah jong u Myntri ka tnat pule puthi, u Rathan Lal Nath na ka bynta ban dawa pynrung kam ia ki STGT candidate.
“Ki pulit ka Tripura kila hukum ban pyndonkam da u lathi pyrshah ia kine ki samla ba pynlong jingiakhih da kaba kila bom bad tied naphang.Kila don haduh kumba 40 ngut kiba la mynsaw ha kane ka jingjia ha kaba sawngut na ki, kila mynsaw jur bad don hapdeng ka jingshah sumar hapoh ka hospital.Ia kane ka jingjia la sakhi ruh lyngba ki lad pathai khubor bad kaba la saphriang lyngba ki social media.Nalor kata la ioh ruh ia ka jingtip ba napdeng kine kiba mynsaw ki kynthup ruh ia kawei ka longkmie armet.Na ka liang ki briew kiba la sakhi ia kane ka jingjia kila ong ba ki bor pulit kila shu bom naphang khlem jingmab.Kito kiba la mynsaw kila hap ban siew hi ia ka bai X Ray bad kiwei pat ki lad jingsumar.Kam shym la don kano kano ka jingiarap na ka liang ka tnat pulit wat ha kaba iadei bad ka jingpynkit ia kito kiba la mynsaw shapoh ka hospital,” thoh shuh shuh u Biswas.
“Ka jingpyndonkam lathi pyrshah ia ki briew kiba pynlong da ka jingiakhih ba jai jai ka long ka bym lah ban pdiang.Kane ka jingleh jong ki pulit ka Tripura ka dei ka jingpynkhein ia ki hok longbriew manbriew.Ka dei ka hok jong ki paidbah hapoh ki kyndon Article 19(1)(a) bad 19(1)(b) jong ka Constitution ba ki lah ban pynlong ia ki jingiakhih kiba jai jai.Ia kane la kdew shai ruh hapoh ka Article 20 jong ka Universal Declaration of Human Rights. Ula ong ruh ba ka jingpyndonkam bor da ki pulit ka Tripura pyrshah ia kine ki samla wadkam ka long kaba beian.”
Kumta ruh na ka liang u Biswas ula kyntu ruh ia katei ka kynhun kaba khmih halor ki hok longbriew manbriew ba kan pynlong ka jingtohkit halor katei ka jingjia bad ban pynioh ia ki hok ki jong ki.
