Shillong, K’Lyngkot 06: U Myntri Rangbah ka jylla Conrad K Sangma hynnin ka sngi palei, ula iathuh ba ka sorkar jylla kala thoh shaka sokrar jylla Chhattisgarh ba dei ban pynshitom tyngeh ia kito ki briew kiba thombor bad pynpra iaka ïngmane ha ka 2 tarik mynta u bnai.
Haba kren sha ki lad pathai khubor u Conrad ula ong ba kum kine ki jingshah thombor bad shah ibein ki riew ngeit Kristan ki ju jia man ka por bad ia kum kine ki jingjia bad ia ki briew ba donkti dei ban pynrem jur.
“Naka liang ka sorkar jylla kala thoh sha ki bor district bad ki bor sorkar ka jylla Chhattisgarh ba kadei ban leh eiei pyrshah ia kito kiba donkti ban thombor bad pynjot pynpra iaka ïngmane hapoh katei ka jylla” la ong u Conrad.
Haba iadei bad ka jingphah lut jingtip ka tnat Pulit ka jylla Assam iaka jingdon ki ïngmane bad ki riewngeit Kristan naka liang u Conrad ula ong ba ka sorkar jylla Meghalaya ka pynrem jur halor kane ka jingleh ki bor district ka thain Kamrup.
U Conrad ula ong ba naka liang ka tnat Pulit ka jylla Assam kam don bor ban phah lum jingtip halor ka jingdon ki riewngeit Kristan namar ha ka ri ba im laitluid mano mano ruh ki lah ban jied hi iala ka niam bad ka jingngeit.
“Nga la iohi ba naka liang u Myntri Rangbah ka jylla Assam ula kren shai ba naka liang ka sorkar jylla kam don jingtip halor ka jingphah lum jingtip bad ula kular ruh ban phah weng noh ia kane ka hukum phah lum jingtip” la ong u Conrad.
