Thoh ka NPP sha u CM ka Chhattisgarh | Kyntu u Conrad ban weng noh ia ka case ki Nun

Shillong, Nailar 01 : Ka National People’s Party (NPP) kala phah da ka jingthoh sha u Myntri Rangbah ka Chhattisgarh Vishnu Deo Sai, ba kyntu ban weng noh ia ka case pyrshah ia ki 2 ngut ki nun (sister ka Balang Catholic) bad ban pynlong ia ka jingtohkit ka bym shah liang.

Ia kane ka shithi la phah da u National President ka NPP bad Myntri Rangbah ka Meghalaya Conrad K Sangma ha ka sngi Palei (31 tarik Naitung).

U Conrad ula ong ba kine ki arngut ki nun ba na Kerela- ka Sister Vandana Francis bad Sister Preethy Mary, kiba trei ha ka Fatima Hospital ha Agra, kila shah bat ha ki Pulit ka Chhatisgarh ha ka 26 tarik Naitung ha Durga Railway Station halor ki jingkynnoh lamler bad jingpynbor na ki kynhun shitniam.

Kat kum ka shithi u ong ba kine ki nun kila synran ia laingut ki kynthei na Chhattisgarh ban leit sha Agra hynrei u Travelling Ticker Examiner (TTE), ula kylli jingkylli ia kine ki kynthei, kiba la batai ba kim don satia ia ki ticket bad kila leit sha Agra da ka jingkyrpad ki nun.

U pyntip ba une u TTE ula pyntip sha ki seng ka thain, kiba la kynnih pat ia kine ki nun ba ki pyrshang ban ialam ia kine ki kynthei bad pynkylla niam jubor.

U Conrad u ngeit skhem ba kane ka jingjia ka dei ka kam thombor bad ka jingkynnoh lamler haba kyntu ia u CM ka Chhattisgarh ba un tuklar lem bad pynthikna ia ka jingbishar kaba hok.

U Conrad ula pyntip ruh ba ka Catholic Bishops’ Conference of India (CBCI) kala phah ia ka jingkyrpad sha u Myntri Rangbah Duh Narendra Modi bad u Myntri kam Pohiing Amit Shah ba kin tuklar lem ia kane ka kam.

Halor kane, ula kynrad ia u Vishnu Deo Sai ba un pyrkhat lem ha kaban weng noh ia ka case bala pynngat pyr shah ia kine ki nun bad pynthikna ruh ia ka jingtohkit ka bym shah liang ha kane ka kam nalor ka jingkyntu ban iada ia ka hok jong ki riewngeit niam ba ritpaid ha Chhattisgarh.