Shillong, Jymmang 26: U Chief Executive Member ka Khasi Hills Autonomous District Council (KHADC) Bah Titosstarwell Chyne ula thoh shithi sha ka Karbi Anglong Autonomous Council (KAAC) ba ai jingmut ia ka jingdonkam ban shong jingialang kyrpang hapdeng ki ar Council, ban iakren halor ka kam iakajia pud ha Block-II.
Ha ka shithi sha u Chief Executive Member (CEM) ka KAAC Dr Tuliram Ronghang, u Bah Titos ula ong “Halor kane ka phang, nga kwah ban ai jingmut ba dei ban iashong jingialang kyrpang hapdeng ka KHADC bad KAAC ban iakren sani bha halor kane ka kam bad ia kaei kaba mih, yn sap hah sha la ki jong ki Sorkar Jylla ba kin leh ia kaba donkam”.
Ula ong ba ka jingiakajia pud hapdeng ka Meghalaya bad ka Assam ka dei ka bym shym la lah ban pynbeit haduh mynta bad kane ka kynthup ia ki jaka kiba hap hapoh ka jingkhmih ka KHADC bad ruh ki jaka hapoh ka KAAC bala tip kum ka Block-II.
Kat kum ka jingong jong u, ka jingbym lah pynbeit ia ka jingiakajia pud kala pynkha ia shibun ki jingeh bad ki paid nongshongshnong ha kane ka jaka khappud, kila mad ia shibun ki jingeh ha ki snem bala leit noh bad ka jinglong jingman kala nang sniew katba nang iaid ki sngi.
“Kane ka kam ba sahteng, ka donkam ia ka jingkut jingmut jong ngi ban iapynbeit noh shisyndon kham kloi kat kaba lah khnang ban lah wanrah pat ka jingshongsuk, shongshngain, ka roi ka par bad ban kiar na ki huri hura bad ki jingkulmar ha ki por ban dang wan” ban jur u Bah Titos.
Haba kyntu ia ka jingdonkam ban pynneh ia ka jingshongsuk shongshngain ha ki jaka khappud, une u Khliehduh ka KHADC ula ong “Iaka mynta, nga sngew ba dei ban pynneh ia ka jingshongsuk kat kaba lah bad ba dei ban pynsangeh noh ia baroh ki kam thombor ia ki nongshongshnong khamtam ki Khasi-Pnar khnang ban burom lang ia ka jingsngew bad ka hok tynrai jong ki kumba la pynkup bor da ka Riti Synshar ka Ri India”.
