Nongpoh, Risaw 29: Ki runar kiba ym lah ban ithuh dur khmat ki la pyrshang ban wiang ding ia ka weighbridge jong ka tnad Transport kaba don ha Umling hynrei donbok ki nongtrei kila la iohi bad ki la leit ban pynlip noh ia ka ding.
Kane ka jingjia ka la jia ha ka por 1.30 baje mynmiet ei ei, ha kaba la kynnoh ba ki runar ki la shu wan rung tuh sor sor sha katei ka kamra bad ki la rah da ka petrol ban synreit ia katei ka kamra bad hadien kata ki la wiang ding shuwa ba kin phet krad.
Ki nongtrei kiba iohi ia kane ka jingjia, kila mareh ban pynlip ia kane ka ding.
Kumba la pyntip da u Superintendent of Police ka Ri Bhoi, u Giri Prasad la ong kane ka kamra ka dei kaba la shu ieh bad khlem pyndonkam ia ka, hynrei kitei ki runar ki la shim kabu ban wan sha katei ka jaka da kaba synreit da ka petrol bad sa wiang ding.
Ula ong ba kane ka jingthmu jongki ban wiang ding ka la pulom noh hadien ba la lap kloi bad ba la lah ban pynlip noh ia katei ka ding ha ka por kaba biang.
U la iathuh ruh halor kane ka jingjia ki bor pulit ka Nongpoh tang mar ia ioh jingtip ki la hiar mardor ban pynlong ia ka jingtohkit bad kumba long haduh mynta kim pat lap ksai satia ia ki runar kiba don kti ia kane ka kam runar.
Shuh shuh, u la iathuh ba na ka liang ki bor pulit ki la register case ia kane ka jingjia bad ka jingtohkit ban lap ia kito kiba don kti ka dang iaid shakhmat.
