Shillong, Iaiong 06 : U National General Secretary bad Symbud Myntri Rangbah Bah Sniawbhalang Dhar, ha ka sngi Saitjain ula ther tyngeh ia u President ka Voice of the People Party (VPP) Ardent Miller Basaiawmoit namar ka jingwan rah ia ka Resolution ban pynduh noh ia ki Autonomous District Council (ADC) ha ka por ba u dang long kum u CEM ka Khadi Hills Autonomous District Council (KHADC).
“U Bah Ardent ha ka por ba u long CEM, ula wanrah ia ka resolution ban pynduh noh ia ki ADC, kaba dei ka jingpyrshang ban tep im ia ka Jaidbynriew. Hynrei donbok, ngi dang don ki Nongialam (kiba pyrshah ia kane ka jingthmu) bad u Blei u khlem ailad satia ban jia kano kano ka jingjia ba sngewsih ia ki paid Khasi-Pnar” ong u Bah Sniawbha.
Haba kren na ka rynsan ialap elekshon ban pan jingkyrshan ia ka kyrtong ka NPP Kong Ampareen Lyngdoh ha Mawryngkneng, East Khasi Hills, une u Symbud Myntri Rangbah ula kynnoh ba u President ka VPP ula pyrshang ban pynduh syndon ia ka jingai jait Kmie da kaba pynshlur ban shim ia ka jait kpa.
“Ki (VPP) kwah ban pynduh noh ia ka Jaidbynriew da kaba pynkylla ia ka jait jong ka Kmie sha u Kpa hynrei ki paidbah kim mynjur bad ailad ia kane?. Kila ong ba ki ieid ia ka Jaidbynriew hynrei ki kwah ban bujli ia ka dustur ai jait Kme da ka Jait Kpa, kaba ju leh da ki briew kiba dei na kiwei pat ki Jaidbynriew” ula ong.
U Bah Sniawbha ula ong ba u President ka VPP ha kiba bun ki jingalang ula kam ba ula noh synniang bha sha ka Jaidbynreiw hynrei ka jingsynniang kaba bun eh ong u, ka dei ka jingiuhroit ia ki nongrep da kaba wanrah ia ka ‘Ot kilo’ ia ki marrep.
Haba ther ia ka VPP ba ka shu pynbiej ia ki paidbah tang ban ioh vote, u Bah Sniawbha ula ong “Ngim shym la wan hangne ban pynbiej ia ki paidbah hynrei ban pynsngewthuh ia ki ym kum kiwei ki party, kiba thok pyllein pyllein ia ki paidbah jong ka Jylla tang ban ioh vote”.
“KI riew tynmen ki ju ong ba ki don shibun jait ki Nongialam, ki don ki nongialam sain pyrthei, ki don ki nongialam niam, ki nongialam shnong bad kiwei kiwei hynrei kaei kaei kaba kongsan hangne ka long ban burom ialade bad burom ia kiwei. Ieid ialade hynrei wat shun ia kiwei. Hynrei kaba sngewsih, ki don ki seng sain pyrthei khamtam ha kane ka jingia lap elekshon, kim don shuh ka rain ka rem ne ka jingburom, ki tharai ba ki dei ki angel bad ki baroh ki paidbah ki dei ki nongpop” ula ong.
Ula kam ruh ba bun ki briew kila babe mynta ba ai vote tang namar ba ki ieid palat ia ka jingrwai elekshon jong ka party.
“Ta ka daw lada phi ieid ia ka Jaidbynriew, phi lah ban pynshisha lyngba ki kam. Ngi dei ki nongmihkhmat ba jied u paidbah. Ngi la shah jied ban shakri san snem. Phi khlem jied ia ngi ban shu shongkli kti ha Secretariat lane District Council. Ngi dei ki shakri jong phi, ngim lah ban shim tulop khlem da treikam. Kum ka nuksa, u Bah Pyniaid Sing Syiem ula long MLA shisnem shiteng, ngi la ai ia ki skhim bapher bapher hynrei sngewsih ba ha ka elekshon 2023, phi la ai vote sha u briew, uba shu pynbiej ia ki paidbah” ong u Bah Sniawbha.
Haba pynpaw ba ki don bun bah ki jingiapher hapdeng ka VPP bad ka NPP, u Symbud Myntri Rangbah ula ong “VPP ka mut Voice of the Pynbeit Paidbah” party (lane kaparty kaba shu pynbiej ia ki paidbah) hynrei ka NPP ka mut Nang Pahuh pynphein Iow Paidbah.
Haba ai jingiaroh ia ka rai jong ka BJP ban kyrshan ia ka NPP, ula ong “Tang namar ba ngi iatreilang bad ka BJP, kam mut ba ngi dei kajuh. Ngi don ka ki jong ki mat treikam. Kam mut tang namar phi vote ia nga, phi lah ban shim ia kaKur Dhar. Lada phi vote ia ka kong Ampareen, yn ym bthah ia phi ban pynkylla ia ka kur jong phi sha ka Lyngdoh. Hynrei peit ia ka jingstad u Myntri Rangbah Duh. Ula ong ba kin kyrshn ia ka Sorkar MDA namar ka jingtreikam jong ka”.
Halor ki jingpynrem ba ka NPP ka pynlong jingialang ha ka Sngi U Blei, u Bah Sniawbha ula ong “Ngi hap ban burom ia ka jingsngew u paidbah. Don ki paidbah kila kwah ia ngi ban pynlong jingialang ha kum kine ki sngi. Lashai, nga don jingialang ha Jhalupara namar ki paidbah kila kyrpad bad nga la burom ia ka jingsngew jong ki. Kane ka dei ka kamram jong u Nongialam. Ngim lah ban khein ipoh iano iano ruh. Ngi don hangne ban pynbeit ia ki kam ki jam”.
Ula ong ba wat hapdeng shibun kiei kiei kiba la kren pyrshah ia ka Sorkar, ka Sorkar NPP hapoh ka jingialam jong u Conrad K Sangma bad Prestone Tynsong kila iaid ha ka lynti kaba dei.
“Hadien ka jingshimti ka Sorkar MDA ha u 2018, uwei na ki nongialam sain pyrthei ula ong ba kane ka dei tang ka Sorkar adhoc bad kan sa khyllem noh shen hynrei kane ka Sorkar adhoc kala kylla long ka Sorkar kaba neh skhem haduh 6 snem. Ka daw ka long ba ka trei na ka bynta ka bit ka biang u paidbah” ula ban jur.
