Shillong, Nailur 17 : Ka jingorpait kala nang heh hapoh ka United Democratic Party (UDP), da ka jingmih ki 8 ngut ki MLA ban iasyllok iala ki paid nongkyrshan ba kin leit iasoh sha ka Bharatiya Janata Party- bad ka party mynta kala pynkhreh ban leh eiei pyrshah ia kine ki MLA.
Haba pynthikna ba ka lah ban don ka jingbishar ban pynshitom ia kine ki MLA, u General Secretary ka UDP Bah Titosstarwell Chyne ha ka sngi Palei u iathuh ba ka Disciplinary Committee jong ka Party bad ka State Parliamentary Board kin sa iashong jingialang shen ban shim ia ka rai.
“Hooid, kum ka party ngin sa lum ia ka jingialang ka Disciplinary Committee laneka State Parliamentary Board, ngin sa shim ia ka rai halor kane” ong u Bah Titos.
Haba kylli la kan don ka jingsospon ia kine ki MLA, ula ong “Ngam lah ban rai marwei. Kum ka Party, ngin sa shim ia ka rai”.
Ula bynrap “Ngam pat lah ban ong ia mynta. Lehse kan don shuwa ka jingai notice show cause hynrei ngam lah ban ong eiei ia mynta namar ka State Parliamentary Board kan sa shong jingialang bad rai” ong u Bah Titos haba pynshai ba kine ki 8 ngut ki MLA ki dang dei hi shibynta jong ka UDP.
“Baroh ki dang don bad ka party namar kim pat mih satia na ka party haduh mynta” ula ong.
Halor kaei ka daw ba orpait ka party, u Bah Titos ula ong ba ki don bun ki daw hynrei ula ong pat ba ka kam nongialam kam don bynta eiei satia.
“Ki don shibun kiei kiei hynrei ngam lah ban iathuh. Hynrei, kam don jingiadei eiei bad ka kam nongialam ka party” ula ong.
Haba kylli la kan dei ka jingmyntoi shimet ha ka sain pyrthei, ula ong “Ka dei ka jingjied ba shimet jong ki”.
