Shillong, Nohprah 15: Ka tnat ka koit ka khiah ka Sorkar Pdeng kala pynbna ba haduh mynta kam shym la don kano kano ka jingtyrwa ban kyntiew kyrdan iaka North Eastern Indira Gandhi Regional Institute of Health and Medical Sciences (NEIGRIHMS) Shillong sha ka All India Institutes of Medical Sciences (AIIMS).
Ka tnat ka koit ka khiah ka Sorkar Pdeng iaka mynta ka dang bishar ban kyntiew kyrdan iaka NEIGRIHMS shaka Institute of National Importance (INI).
Ia kane la pyntip hi da u Myntri ka tnat ka koit ka khiah ka Sorkar Pdeng u Dr Mansukh Mandaviya lyngba ka shithi sha u Bah A.L Hek u Myntri ka Sorkar Meghalaya.
Lyngba ka shithi sha u Bah Hek, u Dr Mansukh Mandaviya ula ong “Iaka ba mynta kam pat don ka jingtyrwa ban kyntiew kyrdan iaka NEIGRIHMS Shillong shaka AIIMS hynrei ka Sorkar Pdeng ka dang bishar ban pybna iaka NEIGRIHMS kum ka INI”.
Haba pynshisha ia kane u Bah Hek ula ong “Haka 18 tarik Risaw 2023 nga la thoh sha u Myntri ka tnat ka koit ka khiah ka Sorkar Pdeng u Dr Mansukh Mandaviya ban kyntiew kyrdan noh iaka NEIGRIHMS Shillong shaka AIIMS”.
U Bah Hek ula iathuh ba iaka jubab ula ioh pdiang haka 14 tarik mynta u bnai bad naka liang u Myntri ka tnat ka koit ka khiah ka Sorkar Pdeng ula pyntip ba kam pat don kano kano jingthmu ban kyntiew kyrdan shaka AIIMS hynrei kala don ka jingthmu ban kyntiew iaka NEIGRIHMS shaka INI.
Ula iathuh ba ka jingkyntiew kyrdan iaka NEIGRIHMS shaka INI kan long ka jingkyrkhu kaba khraw iaki Doctor bad iaki nongtrei namar ka Hospital kan lah ban bat iaki namar kin sa nang bun ki tnat lad jingsumar.
“Hadien bala kyntiew kyrdan ki tnat treikam ruh kin bun bad ki jingmyntoi naka bynta ki Doctor bad ki nongtrei ruh kin bun bha” ula ong.
Nalor kane u Bah Hek ula pynksan ba kawei ka daw kaba ki Doctor ki iai mih na NEIGRIHMS ban leit trei sha kiwei pat ki Hospital kadei namar ki Doctor ba ki nongtrei kim ioh jaka.
“Nga la iakren bad u Myntri Rangbah ka Jylla ruh ban pynpaw ba donkam ban ai jaka iaki Doctor namar ki Doctor wat hadien ba kila shongthait ruh ki dang ai ka jingshakri iaki paidbah” la ong u Bah Hek.
U Bah Hek ula ong “Kum la ai jaka iaki IAS, donkam ruh ban ai jaka iaki Doctor ha ka dor kaba biang khnang ba ki Doctor kin nym mih na kane ka jaka, kin ioh iala ka jong ka ïing ka sem ban shong ban sah khnang ban wanrah ka jingmyntoi iaka Jylla jong ngi lyngba ka jingshakri ba kine ki Doctor ki ai sha u paidbah”.
 Shillong sha ka All India Institutes of Medical Sciences (AIIMS).){kind=link}