Shillong, Nohprah 15 : Ka Iingkashari Meghalaya High Court kala shimkhia ia ki kam kiba la iaid bala leh da ka State Level Committee ha kaban ithuh ia ki jaka ban tei ia ki jaka thang metiap ha kylleng ka Jylla.
Ka Committee kala sdang ia ki kam ban pynshisha ha ryngkat ka jingiamir jingmut bad ki Shnong ki Thaw, ki Deputy Commissioner bad ki Autonomous District Council (ADC) ban ithuh ia ki 59 tylli ki jaka, kiba donkam ia ki jaka thang metiap.
Ka Sorkar Jylla kala pynkhreh ruh ia ka jingtyrwa mang tyngka ban ai ia ka jingkyrshan pisa ba T.1 lak ia kawei ka jaka thang metiap, ha kaba ki kynhun ba pyndonkam ia ki jaka thang kin synniang lang ia ka jinglut kaba tam.
Ka State Level Committee kala peitngor ia ka jingpyntreikam ia ki jingbthah ka Iingkashari bad kan sa aiti ia ka kaiphod halor ka jingioh jaka, ka jingdonkam ki jingtei bad ka jingtyrwa song pisa.
Ka Division Bench ba kynthup ia u Chief Justice Soumen Sen bad Justice HS Thangkhiew ha ka hukum ba pynmih ha ka sngi Nyngkong, kala pynkynriah ban shong bishar biang ia kane ka kam haduh ka 15 tarik Iaiong, 2026, haba bthah ia ka Sorkar Jylla ban file ia ka affidavit ba pynpaw ia ki kam kiba la leh.
