Shillong, Iaiong 16 : U Myntri Rangbah ka Jylla Conrad K Sangma ula pyntip ba ka Sorkar ka don jingthmu ban shna da ka surok 4-Lane na Polo sha New Shillong bad ka Secretariat ba thymmai haba pyntip ba ka jingiakren pynbeit bad ki trai jaka lem bad ki kynhun ba don bynta, kala jan dep artad bad kaba sah ka long satang katto katne ki kam ban shim rai.
“Ki don katto katne tylli ki surok kiba la pyntrei katba ngi dang iakren hangne…kaba heh duh ka dei ka 4-lane ka ban sdang na CRPF Camp ha Polo tang mar synlait ka Jingkieng bad iaid lyngba katto katne ki jaka khlaw bad wat ka thain Hima Mylliem Forest Reserve bad pyniasoh sha Mawpat bad sha Secretariat ba thymmai” ula ong.
U Myntri Rangbah u pyntip ba ki jingiakren kila iaid shaid shaid hapdeng ki agency bapher bapher bad ki trai jaka shimet.
“Ngi la dep pynlong ia ka jingiakren ba bun sien ha ka kyrdan jong ki agency bapher bapher bad ruh ki briew shimet, la ka dei ki riew shimet kiba don jaka ha ka thain, lane bad ka Hima Mylliem lane wat ka skul ki Pulit kaba don ha Golflink” ula ong.
U Conrad u pyntip ba ki kam kila iaid shaid shaid bad mynta kila don ha ka bynta ba khatduh.
“Ngi lah jan pyndep ia ka jingiakren bad baroh kiba don bynta. Ki don 1-2 tylli kiba dang sah hynrei kim dei shuh ki jingeh kiba heh. Ngi la iapoi hi sha ka jingiasngewthuh jingmut, ngi shu donkam ban shim rai tang ia ki katto katne ki kam” ula ong.
