Sam u CM ia ka work order ba T.16.59 klur ban hikai pynroi sap ia 4830 ki samla
Tura, Jymmang 21 : U Myntri Rangbah ka Jylla Conrad K Sangma ula pynbna ba ka Sorkar ka don jingthmu ban seng ia ka Agriculture, Horticulture bad Veterinary College ha Jylla, ia kiba la khmih lynti ba kin sdang ban shim klas noh naduh u snem 2027.
U pyntip ba ia ka Veterinary College yn sa pyntrei ha Kyrdemkulai, Ri-Bhoi District katba ia ka Agriculture bad Horticulture College yn pyntrei ha Williamnagar.
Skillerate 2026 in Tura was a strong reminder that Meghalaya’s biggest strength is our youth.
Today at Holly Hocks, Tura, we distributed PROPEL start-up tools to 798 beneficiaries and issued 34 work orders worth over ₹16.59 Crore under Skills Meghalaya and SHCDM to train 4,830… pic.twitter.com/1OW5mddgFe
— Conrad K Sangma (@SangmaConrad) May 21, 2026
U Myntri Rangbah ula pynbna ia kane ha ka Skillerate 2026 ba long ha Tura ha ka sngi Palei, kaba la pynlong da ka Tnad Labour, Employment & Skill Development ha ryngkat ka CM Skill Mission bad ka Meghalaya State Skill Development Society (MSSDS).
U Myntri Rangbah ula ong ba kine ki jaka pule kin kyrshan ia ki kam wad bniah (research), wanrah ia ki buit treikam ba thymmai bad ki jingstad technology ki ban ai jingmyntoi beit beit ia ki nongrep bad ki nongri jingri ha kylleng ka Jylla Meghalaya.
Haba kren halor ka jingpynroi ia ka sap treikam ki samla, u Myntri Rangbah ula ong ba ka Sorkar kala pynkhlain ia ka jing pynleit jingmut ha ka lad iohkam iohjam, ka lad sengkam sengjam bad ka lah ban kamai na ka bynta ki samla.
U Myntri Rangbah ula ong ba ka Skillerate 2026 ka pyni ia ka jingiohi jngai jong ka CM Connect ka Sorkar, hadien ka jingshem ba ki samla ki pynsngew bha ia ki jingeh lyngba ka CM Connect halor ka jingdonkam ban don kham bun ki lad ha ka jingpynroi ia ki sap treikam, ka jingsengkam sengkam bad ka jingkyrshan ia ka kamai ka kajih.
U Myntri Rangbah ula ong ba katba ka Meghalaya kala kynshew palat ia ka T.32 klur ha ki prokram pynroi sap treikam bapher bapher kiba la ai jingmyntoi ia ki hajar ngut ki samla, ka Sorkar ka shem pat ba tang ka jingai jinghikai kam pat biang satia.
“Kiba bun kiba dep ioh jinghikai ki pynpaw sha ngi ba wat hadien ba kila pyndep ia ki jinghikai jongki, kim don pat ia ki tiar ki tar kiba donkam ba kin sdang ban trei hi noh la ka jong. Ki mechanic ki lah ban pyndep pura ia ka jinghikai hynrei khlem ki tiar ban trei, khlem da plie ia ki karkhana shna kali ka long kaba shem jingeh bha” ula ong.
Haba kren halor ka jingkiew ka ioh ka kot ka Jylla, u Myntri Rangbah ula ong ba ka Jylla mynta kala ioh ia ka jingithuh kum kawei na kiba kiew sted bha ha ka ioh ka kot hapoh ka Ri, hynrei, ula ban jur ba ka jingkiew ka dei ban iai long kaba kynthup lang ia baroh bad poi sha man ki nongshongshnong naduh ki samla,ki nongrep, ki nongbylla bad man ki nongsengkam.
Ha kane ka prokram, la sam ia 34 tylli ki work order hapoh ka Skill Meghalaya bad Supporting Human Capital Development in Meghalaya (SHCDM) na ka bynta ka jingai jinghikai ia ki 4830 ngut ki nongshah hikai ha ki kam bapher baphe, kaba ka jinglut ka long T.16.59 klur.
Hapoh ka Skill Meghalaya la sam ia 28 tylli ki work order kaba kynthup ia 3930 ngut ki nongshah hikai bala mang ban pynlut T.12.04 klur katba ha ka SHCDM la sam ia 6 tylli ki work order ba kynthup ia 900 ngut ki nongshah hikai kaba ka jingpynlut ka long T. 4.55 klur.
Nalor kane, la sam ruh ia ki tiar shna jingshna ba kot T44.72 klur sha ki 798 ngut ki nongioh bynta kiba trei ha ki kam bapher bapher kum kiba trei kam pipe um, shna kali, mistiri , shna mobile phone, kam rep, bad rep tit.
U Myntri ka Tnad Labour, Employment and Skill Development Bah Methodius Dkhar ula ong ba ka jingpynroi ia ki sap treikam ka log kaba kongsan bha ban lah pynkylla ia ka jinglah treikam ki samla sha ka lad kamai kajih kaba don jingmut.
“Haba nga peit ia ki samla hangne, Nga iohi ia ki nongsengkam sengjam jong ka kawei, ki nongwanrah ia ki buit treikam ba thymmai jong ka lawei, bad ki nongwan jingkylla ha Meghalaya” ula ong.
U bah Methodius ula kren halor ki prokram ba dang shen kum ka PROPEL, MEGASKILL, SHIED bad EQUIP kkiba thmu ban pynbun shuh shuh ia ki lad ioh kam iohkam, ka jingioh kam shabar ka ri bad kiwei kiwei.
Ula kyntu ia ki nongtrei bylla ba min register hapoh ki welfare scheme jong ka Buiding and Other Construction Workers Welfare Board (BOCW), kaba kynthup ia ka scholarship, ka jingmyntoi ia ki Longkmie ba ioh khunrit bad ka bai bam tynmen.
