Shillong, Iaiong 19 : U Myntri ka Tnad Arts & Culture Bah Paul Lyngdoh hynne ka sngi Balang, ula pyntip ba ka Sorkar kala tyrwa ia ka kyrteng thymmai na ka bynta ka “SICPAC” lane ka Shillong International Centre for Performing Arts & Culture.
Haba iakren bad ki nongthoh khubor, u Bah Paul ula ong ba hadien ka jingleit jurip ia ka jingtei jong ka SICPAC, la shem ia shibun ki jingbym biang na kaei kaba la buh thong bad na kaei kaba lah ban leh.
“Namar kata, ngin pyrshang ban pynbiang noh ia ki jingduna da kaba sdang na ka kyrteng jong ka project SICPAC ka bym dei ka kyrteng ba sngewtynnad namar ngi don shibun ki unit ba pang swai hangne. Ngin sdang da ka kyrteng thymmai ia ka project namar kan dei ka jaka ban pynlong ia ki rynsan ba heh duh ha NE India kaba ngiam haduh 1700 ngut” ula ong.
“Shibun ki jingpynkylla yn hap ban leh bad ka jingaiti ia ka project sha ka Sorkar Jylla kam pat dep satia haduh mynta watla ka jingplie ia ka, kala dep naduh u snem bala lah” ula bynrap.
Nalor kane, u Bah Paul ula ong ba ka sien jam ba nyngkong kan long ia ka Tnad ka long ba pynioh shimti noh ka Sorkar ia ka project.
“Ngin sa shong bishar kam halor kane ha ka jingialang kaba ngan sa khot ia ki Ophisar kynthup ia u Chief Secretary” ula ong.
