Shillong, Nohprah 16 : U Myntri kam Jngohkai Timothy D Shira ula pynbna ia ka jingthmu ban pyndait noh da ki kor CCTV ha ki katto katne ki jaka jngohkai bala jied ha Jylla, haba kdew ia ka jingdonkam ban pynkhlain ia ki lad jingiada.
“Ngin sa pyndait ia ki kor CCTV ha ki jaka kiba ngi sngew donkam ban buh ia ki kor” ong u Shira haba kren halor ka jingjia shah pyniap u nongjngohkai dang shen ha Sohra.
“Ngin sa peit thuh ia ka jingdonkam ia ki Camera ha ki jaka bapher bapher bad ngin sa pyndait ia ki kat kum ki jingdonkam” ula ong haba bynrap ba ia ka rai ban pyndait kor CCTV yn sa leh haba pynshong nongrim ia ki jingleit khmih jong ki Ophisar ka tnad Tourism na baroh ki District.
“Ngin sa khot ia ka jingialang, iamir jingmut bad ngin pan iaka kaiphod na ki, bad ynda ki ong ba ka long kaba donkam ban pyndait kor CCTV ha ki katto katne ki jaka, ngin sa leh ia kaba donkam” ula bynrap.
U Myntri ula pynpaw ruh ba ka Sorkar kala pynleit jingmut ha ka ban pyndep noh ia ki project ba dang iaid mynta hashuwa ba kan pynsdang ia kiba thymmai.
“Ngi dang don ki project ki ban dang pyndep bad ngi hap ban pyndep ia baroh ki project kiba dang iaid lane kiba dang pynkhreh ban pyntrei ia ki” ong u Shira.
