Shillong, Nailar 22 : Ka Myntri ka Koit ka khiah ka Kong Ampareen Lyngdoh kala ong ba ki jaka ai jingsumar hapoh ka jylla kim pat long kiba biang ne ba don ia ki tiar kiba paka ban sumar ia ki jingpang kaba iadei na ka jingkyrni ha u droks.
Ban shimkhia ia kane, ka sorkar ka dang sdang ban buh ia ka jaka sumar kaba lah ban ai ia ka jingshakri kaba thikna ia ki riewshimet kiba iakhun ban lait na ka jingkyrni.
“U droks ha ka jylla Meghalaya ula sdang jyllei bad nga dap da ka jingsngewkhia kaba jur kum ka Myntri ka koit ka khiah. Nga don ruh ia ka jingtip ba ki jaka sumar ki jong ngi kim pat don ia ki tiar ki tar kiba biang ban ai ia ka jingsumar kaba paka, kaba kynthup ia ka jingshimkhia bad ka jingweng ia katei ka jingeh” kala ong.
“Ngi dang trei halor kane ka bynta. Ngi dang leh katba lah ban pynthikna ba ha ka por kaba khyndiat, ngin don ia ki kor ki bor kiba lah ban shimkhia ia kane ka jingeh” ong ka Kong Lyngdoh haba iakren bad ki nongthoh khubor ha ka sngi Thohdieng” bynrap ka Myntri.
Ka Myntri kala pynbna ba ka Sorkar kala thung ia ka committee hapdeng ki tnad sorkar, kaban kynthup ia ki nongmihkhmat na ka tnad ka koit ka khiah, social welfare bad ka pule puthi ban pynwandur iaka buit treikam ban iakhun ia ka jingeh kaba mih da u droks.
“(Kum ka dkhot jong ka Committee) kin ia shong lang ban lum bad thoh ia ki sienjam kiba donkam ban shim noh mardor (ban shimkhia ia katei ka mat)” la ong ka Myntri.
Kala kdew ruh ba ka lah ban don ka lad ban pyntreikam ia ki jaka sumar kiba la don lypa kum ki Community Health Centre (CHC), ban ai jingsumar ia kiba kyrni droks.
“Nga lah iakren bad ki jaka sumar ki bym shim la treikam shuh ha ka shnong ka thaw. Nuksa lada ka don ka CHC, kaba don marjan bad ka jaka kaba bun paid kum ka Shillong ia kaba ki nongpang kin ym leit ban ioh jingsumar, ngi dei ban ithuh ia kum kitei ki jaka ai jingsumar bad ban peit la ki long kiba lah ban pynkylla iaki, ban pynthikna ban lah ban pyndonkam katkum ka jingdawa kane ka por khnang ba kin ym long kiba sepei bad yn pyndonkam ia ki ha ka lynti kaba dei na ka bynta ban ai jingsuamr ia kiba kyrni droks” kala ong.
Kane ka jingkren jong ka Myntri kadei hadien ba kala mih kawei ka jingjia kaba ka khynnah kynthei kala shah dung da u injekshon ha ki runar, kaba lah ban buh ia ka koit ka khiah ka jongka ha ka jingma kaba khraw.
Kala pyntip ba ka Women’s Wing jongka National People’s Party kala leit ban peit bad iakynduh ia kane ka nongpang hapoh hospital.
“Kane ka jingjia jong ka jingshah dung da u injekshon kadei kaba la jia ryngkhat bad kaba sngewshyrkhei bad ka sorkar kala shimkhia ia kane. Kam dei tang ban kem ia ki runar hynrei ban tip ia kaei kaba la jia bad kiei ki daw kiba la pynlong ban leh kumtei bad haduh katno kane ka khynnah kynthei kala shah ktah jur” la ong ka Kong Ampareen Lyngdoh.
Ka Myntri kala banjur ia ka jingkongsan ban pyntreikam ia ka Drug Reduction, Elimination, and Action Mission (DREAM), ia kaba ka ngeit ba kan ai ia ka jingtuklar kaba biang tam, ban shimkhia bad ban shim ia ki lad kiba dei ban iakhun pyrshah ia ka jingeh kaba mih na ka jingkynrei u droks hapoh ka jylla.
Ka polisi ka thmu ban iaid ha ka lynti ban shimkhia ia ka jingkyrni droks, da kaba pyndonbynta ym tang ha kaban ai jingsumar hynrei ia ki sienjam ban don bynta lang ka imlang sahlang bad ki shnong ki thaw.
“Ngi lah tip bhai a katei ka jingeh. Ngi tip ia kaei kaba ngi leh. Ngi lah shimkhia shwa bad ka tnad ban pynthikna ba ka jingkordor jongka DREAM project kan ym jah lynti noh ym tang ha ka jingpynkhreh jong ka sorkar ban iakhun ia u droks hynrei kan iaid palat kum ka jaka trei kaba kongsan. Kane kadei ka jaka ban ai jingsumar ia kiba kyrni droks, kaban iaid ha ka lynti kaba jrong. Kam dei kaba iaid tang ha kawei ka lynti” kala ong.
Nalor kane ka Myntri kala pyntip ba ka sorkar shen kan sa pynbna ia ka Centre kaba pura kyrpang na ka bynta ban ai jingsumar ia kiba dih droks khamtam eh ha ka nongbah Shillong bad Tura.
Katkum ka jingong ka jiongka, ka jylla mynta kala don ruh ia ka Women Rehabilitation Center, kaba long ka sienjam kaba kongsan ha kaban iakhun pyrshah ia ka jingeh kaba mih na u droks.
