Shillong, Nailur 05: Ka Tnat Pule Puthi ka Sorkar Jylla ka don jingthmu ban phah hapdeng 10-15 ngut ki khynnah skul sha United Kingdom man la u snem kum shi bynta jong ka Student Ex-change Program.
Ia kane la pyntip da u Myntri ka tnat Pule Puthi u Rakkam A Sangma shabar ka jingrahe ia ka sngi kyrpang ki Nonghikai lane ka ‘Teachers Day’ ba long hynne ka sngi Palei ha U Soso Tham Auditorium, Shillong.
Haba kren shaki lad pathai khubor u Rakkam u la iathuh ba 1-2 ngut ki khynnah na kawei ka District ngin sa phah sha London, UK na ka bynta ka Sxcursion Study Trip hapoh ka “CM Global Fellowship Program” ba thymmai.
“Ka thong jong kane ka sienjam ka long ban ailad ia ki khynnah skul ba kin ioh ia ki jingnang jingtip jong kiwei pat ki Ri bad ban nang pynjanai ia ka pule ka puthi na kaei kaba ki mad/iohi” ula ong.
U Rakkam ula pynthikna ruh ba ka Tnad Pule Puthi kan sa pyntreikam lut ia baroh ki jingai jingmut jong u Myntri Rangbah ka Jylla Conrad K Sangma, kaba ula kren ha ka jingialang rakhe ia ka sngi ki Nonghikai.
U Myntri Rangbah ha ka jingkren, ula ai jingmut ia shibun ki bynta kiba donkam ban pynjanai ia ka kam pule dangle ha Jylla kynthup ki Exchange Prokram hapdeng ki skulk a Jylla, ban ai khusnam ia ki skul bala pynshong nongrim na ki kyndon bapher bapher nalor ki result eksam, ban pynrung ia ki ktien lajong, Garo bad Khasi ha ki curriculum haduh ka klas 5 ban kyntiew ia ka kolshor lajong.
U Myntri ula kren ruh halor ka jingpyrshang jong ka Sorkar ban pynbha ia ki jingtei jong ki iingskul haba pynpaw ba palat 2400 tylli ki iingskul ki dei kiba la dep ban shna pynbha.
Da ka song pisa bad ki prokram kumka Pradhan Mantri Uchchatar Shiksha Abhiyan (PM-USHA), Rashtriya Uchchatar Shiksha Abhiyan (RUSA) bad ka NEP, ka kam pule dangle kala kiew bha ha kine ki khyndiat snem bala leit.
