Shillong, Rymphang 08: Ka Tnat Animal Husbandry and Veterinary kala phah ka jingtyrwa (Proposal) kumba T.4 klur tam shaka tnat Pla Tyngka ban ioh buh iaka Health Check Center Byrnihat Ri-bhoi District.
Ia kane u Myntri ka Tnad Animal Husbandry & Veterinary Bah A.L.Hek hadien ka jingialang bad ka Synjuk ki Rangbah Shnong Ri-bhoi, kiba la wan kynduh hynne ka sngi Palei, ban buddien halor ka jingthmu jong ka tnat Animal Husbandry and Veterinary ban pyntreikam iaka Check Health Center ha Byrnihat.
Haba kren sha ki lad pathai khubor u Bah Hek ula ong “Ka tnat Animal Husbandry and Veterinary kala dep ban phah iaka jing tyrwa (Proposal) kaba kot haduh T.4 klur shaka tnat Pla Tyngka ka Sorkar Jylla ban ioh sdang pyntrei noh iaka Health Check Center”.
U Bah Hek ula iathuh ba ka tnat Animal Husbandry and Veterinary kala mang palat T.4 klur tam hynrei namar ka jingduna pisa, ka tnat kala mang shwa tang T.1.5 klur ban sdang pyntreikam suki suki katba ka tnat Pla Tyngka kam pat lah ban mynjur iaka jingtyrwa (Proposal).
Haba kylli halor ka jingdonkam ban don daka Health Check Center, u Bah Hek ula ong “Kane ka Center kan long kum ka jaka buh bad peitbniah ia ka koit ka khiah jongki jingri ba wanrah na shabar ka Jylla hashuwa ban pynrung sha ka Jylla bad ban bam doh da ki paidbah ka Jylla”.
U Bah Hek ula pyntip ba ha kane ka Health Check Center kin don ki Doctor naka tnat Animal Husbandry and Veterinary ban eksamin iaka koit ka khiah ki masi, blang, syiar ne kiwei kiwei ki jait jingri hashuwa ban pynpoi sha paidbah ka Jylla.
