Shillong, Kyllalyngkot 17: U Nongialam ka BJP u Bah AL Hek hynne ka sngi Balang, ula ong ba ka BJP ka don jingthmu ban pynkynmaw biang ia u Myntri Kam Pohiing ka ri u Amit Shah halor ka jingsahteng jong ka mat jingdawa ban pynrung noh ia ka ktien Khasi bad Garo ha ka Khyrnit kaba Phra jongka riti synshar ka ri bad ban pyntreikam noh ia ka Inner Line Permit (ILP) ha ka jylla.
“Lada ngi ioh ia ka lad ban iakynduh ia u Amit Shah ngin iakren bad pynkynmaw biang halor ka Resolution ba la mynjur da ka iingdorbar thawain ka jylla ban pynrung noh ia ka ktien Khasi bad Garo haka Eight Schedule jong ka riti synshar ka ri bad ban pyntreikam noh ia ka ILP haka jylla” ong u Bah Hek haba iakren bad ki nongthoh khubor.
Ula ong ba kine ki mat kidei kiba kongsan bha na ka bynta ka jylla baroh kawei.
Halor ka jingsngap jar ia ka jingdawa ia ka ILP, u Bah Hek ula ong, “Ki bun palat kiba hap ban leh hapoh ka ri bad ki bun kiba dei ban leh na ka bynta ka Meghalaya ruh, kumta shwa ban shim ia kano kano ka rai, ki hap ban bishar bniah bha, la kan ai jingmyntoi ne kan pynduhnong bad kane ka long laba donkam bha ban iatai”.
Ula ong lada iakynduh ia u Amit Shah, ka BJP Meghalaay kan iakren ha kaba iadei bad ka North Eastern Council (NEC) kaba peit ia ka Meghalaya bad iaki jylla baroh jongka thain shatei lammihngi, ba kan theh kham bun ia ki kam pynroi ha ka liang ka kam jngohkai.
“Ngin kyrpad ban ai skhim kyrpang ia ka Meghalaya ha kaba iadei bad ka kam jngohkai khnang ba yn lah ban kyntiew shuh shuh ia ka kam jngohkai ha ka jylla” ong u Bah Hek.
U Bah Hek ula ong ba yn iakren ruh ia ki skhim kiba iadei bad ka kam jngohkai kiba la phah da ka sorkar jylla lyngba ka Tnad Jngohkai bad yn kyrpad ia u Myntri ka sorkar pdeng ba lyngba ka ophis jongka NEC ba kan iarap ha kaban kyntiew ia ka kam jngohkai ha ka jylla Meghalaya bad ha ka thain shatei lam mihngi.
