Shillong, Naitung 4: U Myntri ka Tnad Social Welfare u Bah Paul Lyngdoh ula pynbna ba ka sorkar jylla kala thung iaka Advisory Board, ka ban pyntreikam pura iaka Prevention of Illicit Traffic in Narcotic Drugs and Psychotropic Substances (PIT NDPS) Act 1988 ban iakhun pyrshah iaka jingdie drok ha ka jylla.
U Bah Paul ula pyntip ba ia kane ka Board yn khlieh da u Nongbishar bala shongthait ka Iingkashari High Court, Justice Shivaji Pandey kum u Chairman ryngkat bad ar ngut ki dkhot kiba dei ki i Senior Advocate kata u Bah ND Chullai bad ka Tsering Yangi.
“Da da ka jingdon jong katei ka Advisory Board mynta ngin lah ban pyntreikam pura iaka PIT NDPS Act naduh mynta ka sngi” ong u Bah Paul haba iakren bad ki nongthoh khubor hynne ka Sngi Baar.
Ula ong ba katei ka Act jong u snem 1988 ka long kaba khlain ha kaba iadei bad ka jingtehlakam iaka kam die drok ha ka jylla kumba la kdew shai haka Clause 10 jong ka Act, kaba long kum kawei na ki jaka kaba u drok u jyllei bha kiba die bad kiba pyndonkam.
U Myntri Sorkar ula ong ba ka daw bah bala pyntreikam iaka ain kaba khlain ka dei namar ka daw ba ka ain Narcotic Drugs and Psychotropic Substances (NDPS) Act 1985, ka don shibun ki jingduna bad kam lah ban tehlakam ne pyrkhing bha ia ki nongdie drok.
Ula ong ba lyngba ka jingpyntreikam pura iaka PIT NDPS Act, kan shimkhia ia ki jingujor pyrshah ia ki briew kiba la mlien bha ha ka kam die drok wat hadien ba kila ioh mih na ki thanad pulit ne phatok.
U Bah Paul ula ong ba kane ka ain kan phaikhmat bha ia katei ka bynta namar kan pynkup bor iaka jylla ban bat ia ki briew haduh 6 bnai bad ban pynjlan sa 6 bnai lada kidei ki briew kiba mlien ban khaii ne die drok be-aiñ hynrei lada dei ba ia ka jingbat hap ban pynjlan sa 6 bnai yn hap ban ioh iaka jingmynjur na ka Advisory Board.
“Ka sorkar jylla kan don ia ka bor ban set 3 bnai haduh 2 snem ia ki nongdie droks. Uno uno uba shah kem lyngba katei ka kyndon aiñ bad lait noh na ka jingbthah jongka Advisory Board, un dang lah ban shah kem biang bad ban shah set biang lada jia ba ka don kano kano ka jingujor pyrshah ia u. Kiba shah kem kin shah pynkynriah ruh na kawei ka jaka sha kawei pat hapoh ka jylla ne wat shabar ka jylla” ong u Myntri ka Tnad Sorkar.
Ula pyntip ba ka jingthmu jong ka sorkar ban buh ia katei ka Board bad ban pyntreikam pura ia katei ka aiñ ka long ban tehlakam ia ka jingjyllei u drok ha ka jylla bad ban rat dyngkhong ia une u jingdih pynbuaid uba sniew uba ktah ia ki samla bad iaka imlang sahlang hi baroh kawei.
Pule ruh: Dawa ka Raid Marwet ban jied Rangbah Shnong Pyllun da ki khun ki hajar ka Raid
 Act 1988 ban iakhun pyrshah iaka jingdie drok ha ka jylla.){kind=link}