Shillong, Naiwieng 11 : U Ophisar IPS barim Bah Francis G Kharshiing ha ka sngi Nyngkong, ula shimti kum u Mission Director ba thymmai ka Drug Reduction Elimination & Action Mission (DREAM) bad ban jur ia ka ingdonkam ban iashimbynta lang ki Shnong ki Thaw ha ka jingiakhun pyrshah ia u droks hapoh ka Meghalaya.
Hadien ka jingiakynduh ia u Myntri ka Tnad Social Welfare Bah Paul Lyngdoh ha Ophis treikam jong u, u Bah Kharshiing ula ong ba ka Sorkar Jylla ka kwah ban iakhun pyrshah ia u droks lyngba ka DREAM ban pynthikna ia ka Meghalaya kaba lait na u droks.
“Kane ka dei ka jingwan iakynduh ba nygkong ia u Myntri badei khmih bad ngi la iakren ia ki katto katne ki jingai jingmut ba kumno ngin jam shakhmat ia mynta. Nga la pyntip sha u Myntri ba nga la sdang treikam khlem ka kamra, ka shuki khlem ki nongtrei ban iarap hynrei ngam khuslai ia kine kiei kiei, bad ngi la sdang pyniaid ia ka kam bad nga la dep khot jingialang ruh ia ki katto katne ki nongshongshong ba don jingkitkhlieh kynthup ki Rangbah Shnong, Sengbhalang, ki samla pule ban long lashisngi ka 13 tarik Naiwieng ha Ophis ka Social Welfare” ula ong.
“Kane ka mat ka dei kaba nga sngewtynnad eh. Nga kwah ban iohi ia ka Jylla jong ngi kaba lait na u droks, ta ka daw nga la pdiang ia kane ka kam. Ngan pyrshang kat kaba nga lah. Watla nga hap kren shai ia kane, u soh phi lah ban nym iohi tang ha ka shisngi ne shibnai ne shisnem hynrei ngin sa sdang leh eiei bad ngin pyrshang katba lah ban pyniaid shakhmat ia ka project” ula bynrap.
Haba kylli, une u Mission Director ula ong ba ka jingiasnohkti lang ki shnong ki thaw ka long kaba kongsan bha ha ka jing iakhun pyrshah ia u droks.
