Shillong, Jylliew 07 : Palat 70 tylli ki Dorbar Shnong ka Nongbah Shillong, kila iamynjur lang ban iathaw ia ka Village Defence Party (VDP) hala ki Shnong, ban iarap ia ka Sorkar Jylla ha ka jingiakhun thma pyrshah ia u droks hapoh ka Jylla.
La kyntu ruh ia ki Dorbar Shnong ba kin phah ia ki jingai jingmut halor ka jingtyrwa ban pynkylla ia ka The Meghalaya Defence Organisation Rules, 2008, hapoh ka lai taiew haduh ka shibnai ka por.
Ia kane ka rai la shim ha ka jingialang iasyllok bala pyniaid da u Myntri ka Tnad Social Welfare Bah Paul Lyngdoh, kaba iatai halor ki sienjam ban iakhun pyrshah ia u droks bad ka jingthaw ia ki VDP bad ki MLA, ki MDC bad ki Dorbar Shnong ka Greater Shillong kaba long ha State Convention Centre, Shillong hynne ka sngi Thohdieng.
Haba iakren bad ki nongthoh khubor, u Bah Paul ula ong “Ka sienjam ba nyngkong eh bala mynjur da ki kynhun ba iadon bynta ka long ban thaw biang ia ki VDP, kiba la trei shitrhem bha ban iakhun pyrshah ia ki kam bymman khamtam ha ki jaka nongkyndong hynrei haba phai sha ka kam ban tehlakam ia u droks bad ka jingrung ki jingdih pynbuaid, mynta ka sngi ngi la rah ba ki Dorbar Shnong bapher bapher kin pynkhreh ialade ha kaban thaw ia kine ki VDP”.
“Ban pynsdang ia kane, ngi hap ban sdang da kaba khmih biang ia ki Rules bapher bapher kiba la thaw ha u snem 2008, bad ngi sngew donkam ban pynthymmai ia ki rules haba iohi ia ka jingnang bun ki jingkylla ki jingtynjuh. Ngi la shim ia ki jingtip na ki Dorbar Shnong bad buhpor 3 taiew haduh shibnai ia ki ba kin aiti ia la ki jong ki jingtyrwa ha kaban pynkylla ia kine ki Rules” ula bynrap.
U Bah Paul ula ong ba hadien bala dep mynjur ia kine ki jingpynkylla, ki Dorbar Shnong bapher bapher kin sa sdang ban thung ia ki VDP, ki ban iarap ia ki Pulit bad ruh ia ka Sorkar ha kaban iakhun pyrshah ia u droks hala ki shnong ki thaw.
Haba kylli, u Myntri ula ong “Ngin sa iakhmih biang ia kine ki rules. Ngin pynthikna ba ki VDP kin dei ki shipai jong ki bor ka Ain bad ryngkat lang kin iarap ha kaban pynthikna khamtam ia ki jaka ba jur ka jingpyniaid iew ia u droks bad da ka jingiarap jong ki, ngi dei ban lah ha kaban ratdyngkhong ia u droks na Meghalaya”.
U bah Paul u ong ba ka jingthmu jong kane ka jingialang hi ka long eh ban nang pynbun ia ki briew ki ban iakhun pyrshah ia u droks ka ban sdang naduh ki shnong ki thaw, ban iarao ia ki Pulit.
Nalor kane, u Myntri ula pyntip ba la shim rai rai ba un sa sam ia ki copy jong ki ain ba dang shu mih bad ki rules kum ka PITNDPS sha ki Dorbar Shnong ba kin iakhmih bad ai jingmut lang ha kaban pynjanai ia kine ki rules.
“Ngi la rai ruh ba ki Nongmihkhmat paidbah, ki MLA bad NDC jong baroh kawei ka Jylla kin sdang ia kane kajuh ka kam kaba ngi la sdang mynta ka sngi bad ban leit iasyllok kylleng ki jaka namar ngi kwah ban iatreilang kum kawei ka kynhun ban pynthikna ia ka jingjop jong ka DREAM Project” ula bynrap.
 hala ki Shnong, ban iarap ia ka Sorkar Jylla ha ka jingiakhun thma pyrshah ia u droks hapoh ka Jylla.){kind=link}