Shillong, Lber 05 : U Symbud Myntri Rangbah ba khmih ia ka Tnad kam Pohiing (Police) Bah Prestone Tynsong ha ka sngi Balang ula ong ba ka Sorkar kala ieng skhem ha ka nongrim ba kan nym aili halor ka kam khaii droks haba pynskhem biang ia ka jingkut jingmut ban rat naduh dyngkong ia une u jingdih napoh ka imlang sahlang.
“Ka jingpynjor jong u droks ia ki riew shimet, ki longiing longsem bad ki shnong ki thaw, kala pynlong ia ka Tnad Pulit ban pynkhlain bha ia ka jingpeit pyrman, ka jingiatreilang bad ki Agency bapher bapher, ka jingpynbun ia ki sienjam ban iakhun ia une u jingdih na ka bynta ka jingshngain bad ka imlang sahlang ba lait na u droks” ula ong.
U Bah Prestone ula pyntip ruh ba ka Meghalaya kala shim dang shen ia ka sienjam kaba khraw ha ka jingiakhun pyrshah ia u droks da kaba pynkha ia ka kam Superintendent of Police, Anti-Narcotic Task Force (ANTF) ha ryngkat bad ka jingpynkhra ia ka ANTF Police Station ka ban pyni lynti, peitngor bad tohkit ia ki case NDPS.
“Nalor kane, ka Sorkar kala pynmih ia ka jingpynbna bala thaw ia ka Advisory Board ha ka 30 tarik Jylliew 2024 hapoh ka Prevention of Illicit Traffic in Narcotics Drugs and Psychotropic Substance Act 1988 (PITNDPS Act). Ka jingthmu jong kane ka Advisory Board ka long ban peit ia ka kam set along ia ki briew bala shah kem bunsien ha ka jingkhaii drok kat kum ki kyndon jong ka Ain” ong u Bah Prestone haba wanrah ia ka jubab hapoh ka Iingdorbar halor ka call attention motion u MLA ka VPP na Mawryngkneng.
U pyntip ba haduh mynta, lai ngut ki nongkhaii droks kila shah set hapoh ka kyndon PITNDPS Act, 1988 bad ka jingtyrwa ban set along ia kiwei ki nongkhaii droks bala kem bunsien ka dang iaid ha ka jingbishar.
“Kum shibynta na ka jingiakhun ia ka kam khaiidroks bad ban pynthikna ia ka jingpynjot ia une u jingdih, ia ki jingdih bala kurup na ki 56 tylli ki case la thang noh ha ka 23 tarik u Kyllalyngkot ha ka jaka thang niut ka Star Cement, Lumshnong, East Jaintia Hills” ong u Bah Prestone haba pyntip ba haduh 2.9977 kg u heroin, 2,561.989 kg u ganja, 10.16 kg u crystal meth, 2.771 kg u yaba tablets bad kiwei kiwei ki jingdih kynthup u opium, nitrazepam bad codeine-la iathang ha kane ka sngi.
 Bah Prestone Tynsong ha ka sngi Balang ula ong ba ka Sorkar kala ieng skhem ha ka nongrim ba kan nym aili halor ka kam khaii droks haba pynskhem biang ia ka jingkut jingmut ban rat naduh dyngkong ia une u jingdih napoh ka imlang sahlang.){kind=link}