Imphal, Jylliew 10 : Haduh 10 tylli ki seng sain pyrthei ka Manipur bala ialam da ka Congress, ha ka sngi thohdieng kila kyrpad ia u Myntri Rangbah Duh ka Ri Narendra Modi ba un tuklar lang ha kaban wanrah pat ia ka jingsuk bad ka jingshongsuk shongshngain hapoh ka Jylla kham kloi kat kaba lah.
U Myntri Rangbah barim ka Jylla bad Nongialam ka Congress O Ibobi Singh ula ong ba ka jingshngai jar jong u Modi halor kane ka thma iapher jaidbynriew ha Manipur ka pyni shai ba ka Sorkar Pdeng kala phai lyndet ia ka Jylla.
Ula ban jur ruh ba katba ka jingwan iuhkjat u Myntri kam Pohiing Amit Shah ka dei kaba la iaroh, hynrei ka Manipur ka dang bteng ban mad ia ki kam pyntriem bad ki jingjia ba shyrkhei ba khlem sangeh satia.
Ki 10 seng sain pyrthei ha ka jingialang ha ka sngi Thohdieng ha Congress Bhavan ha Imphal, kala rai ban kyntu ia ka Sorkar Jylla ba kan pynlong ia ka Dorbar Kyrpang jong ka Iingdorbar Thaw Ain ka Jylla na ka bynta ban iakren halor kane ka jingbym shongsuk.
Ki 10 tylli ki seng sain pyrthei ki kynthup ia ka CPI, CPI-M, JD-U, Forward Bloc, RSP, SS-UBT, Trinamool Congress, NCP nalor ka Congress.
