Shillong, Jymmang 03: Ka Sustainable Transport and Efficient Mobility Society (STEMS), kaba la thaw da ka sorkar jylla, kala thied ia 30 tylli ki bos kiba la pyndait ia ki GPS, CCTV, Live Location Tracking bad ka Mobile Application ban buh jaka shong, ban pyndonkam ha kaban kit ia ki khynnah skul hapoh ka Nongbah Shillong.
Ia kine ki bos la thied kum ka jingpyrshang ban peit la ka treikam ne em (Pilot) ha kaban pynduna ia ka jingdheng kali ha Nongbah Shillong, ia kaba la pynshong nongrim na ki jingleh survey bad jingwad bniah ha kaban pyndonkam ia ka jingshakri jong ki bos ban kit ia ki Khynnah jong ki katto katne ki skul kiba don ha ki thain Laitumkhrah bad Dhankheti.
Ia kane la pyntip da ka Chief Executive Officer ka STEMS Kong Isawanda Laloo haba pyntip ba ia kitei ki bos yn pyniaid da ka kynhun kaba kyrpang jong ka STEMS kiba kynthup iaki supervisor kiba la ioh jinghikai, ki nongniah bad naka bynta ka jingshngain jong ki khynnah skul kiba la pynrung kyrteng, la buh ia ki nongpeit kiba la ioh jinghikai kyrpang ha man la ki bus.
Ka Kong Isawanda kala pyntip ba da ka jingsdang ia katei ka projek, la buh iaka thong ha kaban lah ban pynduna iaka jingshaniah tang ha ki kali shimet ha ka leit ka wan ia kaba la shem ba kam long kaba biang bha bad kawei ruh na ki daw bah jong ka jingdheng kali ha ki por kiba kyrkieh.
Ka jing rejistar na ka bynta ki jaka shong ne Seat ha ka ‘STEMS Buses’ lyngba ka mobile application, ‘STEMS Meghalaya’ la plie mynta bad ki kmie ki kpa kiba don iaka jingthmu ki lah ban download ia katei ka mobile application na ka Google Play Store bad ban iaid shakhmat ha kaban rejistar iala ki khun.
Ka jingbatai kaba bniah thik pa thik na ka bynta ban rejistar lah ban pule da kaba leit haka https://stems-meghalaya.nic.in/ bad yn sa sam ruh sha ki kmie ki kpa lyngba ki bor pyniaid skul bad ia katei ka App yn sa pyllait noh shen ha ka iOS App Store.
Lah ban kdew ba ha katei ka jingsdang ia ka projek la mang 900 tylli ki seat ha ka STEMS Bus Service. Ka jingjied iaka lynti iaid jong ka Bos bad ka jingjied ia ki khynnah skul yn sa pyndep hadien ba la kut ka jingrejistar bad yn pynshong nongrim halor ka jingjur jong ka jingdawa.
Na ka bynta kino kino ki jingtip ki kmie ki kpa ki lah ban iakren bad ka customer care helplines ha u nombar 0364-3500097/ 0364-3500098 ha ka por longtrei ne ban shu email ha ka [email protected]
