Shillong, Lber 06 : Palat 500 metric ton u synsar la thied da ka jingpyllait pisa ba kot T.4.76 klur, kaba la kyrshan ia ki spah ngut ki nongrep synsar ka Jylla.
Ia kane la pyntip da ka Myntri kam rep Kong Ampareen Lyngdoh haba jubab ha ka kynta kylli jingkylli hapoh ka Iingdorbar Thaw Ain.
Kat kum ka jingong jong ka, ia kane ka jingkyrshan la ai hapoh ka CM ASSURE, kaba dei ka skhim thied marrep ka Sorkar kaba ju pynmih na ka por sha ka por ia ki marrep ki bym pyut, haba don ka jinghiar dor ha Iew ha hat.
Ia ka dor ki mar la buh ban buria ia ka jingpynlut ha ba rep bad ban pynthikna ia ka jingiohnong jong ki nongrep.
“Ha u 2024, ban weng ia ka jingeh jong ki nongrep synsar haba die ia ki mar, ka Sorkar Jylla kala wanrah ia ka skhim Procurement and Aggregation Scheme.
Ha kane ka skhim, ka Meghalaya State Agriculture Marketing Board (MSAMB) ka shim ia ki synshar na ki nongrep bad thied ha ka dor kaba kham heh ia ka dor ba buh ha iew ha hat. Palat 500 metric ton u synshar la thied da ka jingpyllait pisa ba T.4.76 klur, kaba kyrshan ia ki spah ngut ki nongrep synshar.
Ka bynrap ba hadien ka jingkhein jingdiah bha, ka Sorkar kala rai ban pynbteng ia kane ka skhim khnang ba kan lah ban mih shakhmat ban iarap ia ki nongrep kiba shem jingeh.
Haba jubab bynrap ia ka jingkylli bala wanrah da u MLA ka UDP na Amlarem Bah Lahkmen Rymbui, u Myntri Rangbah Conrad K Sangma ula ong ba kane ka skhim ka dei kaei kaei kaba u thep mynsiem bha bad kaba kongeh eh ka long ba kane ka prokram ka dei kaba la mang ha kaban tuklar ha ka por ba ki nongrep ki shem jingeh.
“Ngim lah ban shu khein ia ka jingjop jong ka skhim bad ka Marketing Board da kaba shu khmih ia ka jingthied mar bad die mar jong ka Board” ula ong haba bynrap “Ngin nang pynjanai ia ka skhim bad ka kamram jong ka Marketing Board ba kan thied bad die kat kum ka dor iew hynrei ki nongrep ha ka por ba ki shem jingeh kin ioh ia ka jingkyrhan na ka Sorkar”.
Haba u MLA ka Congress na Mylliem Bah Ronnie V Lyngdoh u kwah ban tip la ka Sorkar kan pyrkhat lang ha kaban kynthup ia kiwei kiwei ki jingthung ha ka skhim, u Conrad ula ong ba kane ka sienjam ka dei eh tang ia ki mar ki bym pyut kum u synsar bad u kwai.
Haba phai sha ki marrep ba pyut, u Myntri Rangbah ula kular ba ka Sorkar kan sa pyrshang ban pyn bun ia ki cold storage bad processing unit.
“Bun bah ki cold storage kila mih ha kine ki hynniew snem bad kin dang bun ruh kiban sa mih” ula bynrap.
