Shillong, K’lyngkot 09 : U President ka United Democratic Party (UDP) Bah Metbah Lyngdoh hynne ka sngi nyngkong, ula thet kti kum u “Pontius Pilate” (Pilat) da kaba kynnoh ia ka National People’s Party (NPP) halor kino kino ki rai, ki hukum lane ki Policy kiba lah ban pynbitar ia ki paidbah ka Jylla lane kino kino ki jingsngewkhia ba ki don.
Lah ban kdew hangne ba ka UDP ka dei ka paralok ba bun paid eh nalor ka NPP ha ka Sorkar MDA bad ka don haduh 2 ngut ki MLA ha ka kynhun Myntri ne ki Myntri Sorkar.
U Bah Metbah ula ong ba lada ki briew kim sngewtynnad ia ka Sorkar MDA ba ialam da ka NPP ki dei ban ai kham bun ki MLA sha ka UDP haba ong “Ai ia ngi kham bun ki MLA bad ngin ai ka jingshakri ba kham bha”.
Haba kam ba ki Nongthaw Ain ka UDP kila shu long tang ki MLA ha ka Sorkar synrop MDA, u Bah Metbah ula ong “Lada ki paidbah kim sngewtynnad, kane ka dei ka por ia ki ba kin rai. Kane kadei ka rynsan ia ki ba kin rai. Namar kata ngi la ong ba ngi la leit sha man ki kyndong kynshrot namar ha kane ka sorkar MDA ngi dei tang ki MLA”.
“Lada ki ong ba kim sngewtynnad hapoh ka jingialam jong ka NPP, ka UDP ka don hangne,ai ha ngi ia ka rai” ula bynrap.
U Bah Metbah ula ong ba ka UDP kala ju kren ia ki jingpynsngew jong ki paidbah ia ki ishu pyrshah ia ka Sorkar lane ia kano kano ka thad. “Ngim ju burieh ia kaei kaei baroh kaba ngi sngew donkam ia ngi ban kren na ka bynta ki paidbah jong ka Jyla” ula ong.
Une u Nongialam ba hakhlieh duh ka UDP ula pynpaw ia ka jingbym bna eiei halor ka jingujor jong u Vice President pyrshah ia ki Myntri bad MLA ka Sorkar ba kynnoh pyndonkam bakla ia ka skhim FOCUS bad FOCUS+ jong ka Sorkar.
Hynrei ula ong pat ba ka long kaba bakla lada ka NPP ka kwah ban ialeh kam politics ia ki kam jong ka Sorkar lane ki prokram baka pyntrei.
