Shillong, Lber 18 : U phria uba heh kat ki marble bad ba kham palat, ula ther hynne ka janmiet ha kylleng ki jaka ka West Jaintia Hills District bad pynjulor ia bun tylli ki Iing kynthup ia ka Pandal jong ka Khasi Jaintia Presbyterian, kaba la pynieng ban pynlong ia ka Jingiaseng Synod ha shnong Nongbah.
Kane ka jingwan lynshop u phria kala jia ha ka por 1 baje janmiet bad kat haduh ba thoh ia ka khubor, la pyntip ba kane ka jinghap u phria ka dang bteng ha kiba bun ki jaka.
Ka khubor ba ioh na ki nongshongshnong ka Mooshrot, West Jaintia Hills, la pyntip ba ka jingwan hap u phria ka long kaba jur bha bad bun tylli ki Iing bad ki jingthung jingtep ha kane ka Shnong, kila julor.
La ioh khubor ruh ba ha Nongbah, ka jingther jong u phria ka long kaba jur bha haduh ba kawei ka Pandal jong ka Balang Presbyterian ka Shnong Nongbah, kala julor. Kane ka pandal ka dei kaba la pynieng na ka bynta ban pynlong ia ka Jingiaseng Synod lashai ka sngi.
