Shillong, Iaiong 27 : U lapbah lapsan ula ther kynsan kynsan ha ryngkat ka eriong ha kiba bun ki bynta jong ka South West Garo Hills ha ka miet sngi U Blei, uba la pynjulor ia bun tylli ki Iing ha ki shnong bapher bapher bad ktah ia kumba 76 ngut ki briew.
Wat hapdeng ka jingjur ka eriong erngit, donbok ba ym shym la don kano kano ka jingjia ba sngew sih ne ka jingmynsaw briew, ong ki heh Ophisar na ka Ophis u Deputy Commissioner.
Kat kum ka jingong jong ki “ Ki jaka kiba shah ktah jur eh ki dei kiba hap happoh ka Rerapara, Zikzak bad Purakhasia C&RD Block, kiba la sakhi ia ka jingsyllad ka eriong bad ka jingpom pyrkhat kaba shyrkhei bha”.
“Ka Rerapara ka dei kaba shah ktah eh napdeng ki Block, ha kaba haduh 36 ngut ki briew kila shah ktah na ki san tylli ki Shnong. Ka eriong kala pynjulor ia bun tylli ki iing ha ka thain, kynthup ia kawei kaba la shah pynjulor pura bad 4 tylli kiba shah pynjulor mar shiteng” kila ong.
Ha Zikzak C&RD Block, kumba 28 ngut ki briew kiba shah ktah bad san tylli ki Iing kila julor ha ki lai tylli ki Shnong.
Ha Purakhasia, 12 ngut ki briew kila shah ktah bad artylli kila shah pynjulor ha ki artylli ki Shnong.
“Baroh lang, 12 tylli kila shah pynjulor, 11 tylli kiba shah pynjulor mar shiteng bad kawei kaba la julor pura-ha ki 10 tylli ki shnong hapoh ka District” bynrap ki heh Ophisar.
Kane ka erring kala pynjulor ruh ia ki jingtei kiba kongsan. “Ka solar panel ha Mellim Primary Health Centre kala shah kyndang, ki waiar bording kila dkhot bad ka lynti ban leit sha ka Ophis u Deputy Commissioner kala shah ktah” kila ong.
Ki bor khmih kila shimkhia mardor ban maramot ia ka jingsam bording hadien kane ka jingjia haba pyntip ba ka jinglum jingkhein ia ki jingpynjulor ka dang iaid shakhmat mynta.
Ki bor khmih ki dang bteng ban peitthuh ia ka jinglong jingman bad kila shimkhia bha ruh ban ai jingiarap ia ki longiing kiba shah ktah ha kine ki shnong.
