Ther u Heh Congress ia ka VPP : Pynshai kaei ka Jingkylla ba ka kwah na ka Reservation Policy

Nongpoh, Jylliew 06 : U President barim ka Meghalaya Pradesh Congress Committee (MPCC) bad MLA ka Umsning Dr Celestine Lyngdoh ula ther tyngeh ia ka Voice of the People Party (VPP) namar ka jingpynkhihwin bad pynkulmar jingmut halor ka Reservation Policy bad buh jingkylli ruh “Balei kane ka Party kam pynshai haduh mynta ba kaei ka jingkylla ba ka kwah ha ka Reservation Policy”.

Une u Heh ka Congress ula kynthoh ia kane ha ka jingialang bad ki Nongialam ka Party Congress ba long hynne ka sngi Ba-ar ha Umsning ban pynshai paidbah halor ka Roster System bad ka Reservation Policy, ha kaba da ki spah ngut ki Nongialam kila wan ban sngap ia ki jingpynshai.

“Bun ki paidbah, ki Sengbhalang bad ki kynhun bapher bapher kila kynthoh ia nga halor ka jingsngap jar ban kren shaphang ka Reservation Policy. Don ruh kiba leit tied tin ha Iing hynrei ka daw ba nga sngap ka long ba nang shuh ban pyrkhat kaei kaba beit bad kaei ka bymbeit….kaei kaba iohnong bad kaei kaba duhnong” ong u Dr Celestine.

Kat kum ka jingong jong u, kine kiei kiei baroh kila mih na ka jingiakhih jong ka VPP bad ka jingshong shah jingit jong u Nongialam ka VPP bad MLA ka Nongkrem Bah Ardent Basaiawmoit, kiba dawa ia ka Sorkar Jylla ban shong bishar thymmai ne pynkylla thymmai noh ia ka State Reservation Policy.

“Ngam lah pei phang shuh…haduh mynta ka VPP ne u Bah Ardent, kim pat ai ne pynshai kaei ka jingkylla ba ki kwah na ka Sorkar haba iadei bad ka Reservation Policy…ha kano ka rukom ba ki kwah ban pynkylla” buh jingkylli une u MLA.

“Lada ki paralok Garo ki hun ban iakhun lang ia ka 80% bad Khasi bad Garo te ka suk eh ban pynkylla, hynrei lada u Garo um treh, khlem pep kan sa poi ka por ba un sa leit sha Iingbishar ban dawa la ka hok. Lada um (Garo) treh mano ban pynngeit” ula bynrap.

Halor ka jingthaw ka Sorkar ia ka Expert Committee ban shong bishar ia ka Reservation Policy, u Dr Celestine ula ong “Ka Expert Committee kam lah ban iaid lait ia ka Mandal Commission Report bad baroh ka rai kaba iadei bad ka Reservation Policy kiba poi sha ki Iingkashari High Court bad Supreme Court” bad bynrap “Ka Iingkashari Supreme Court ka ong beit kat kum ka jingpynthikna da ka Mandal Commission Report ba ym lahban buh bhah (Reservation) palat ia ka 50% hynrei ha ka Jylla jong ngi, ngi ioh haduh 80%”.

Une u Heh Congress ula kynthoh “Ka VPP ka dei ban pynshai paidbah shuwa ba kaei kata ka jingkylla ba ka kwah ha ka Reservation Policy….Uba shah thngan ula shah thngan bad sangeh noh mynta hynrei ka VPP tdot ka khlem pynshai sha u paidbah ia kaei kata ka jingkylla ba ka kwah..Ka long ka kam ba ithamula bad ka dei tang ka drama”.

“Hadien ba thaw ia ka Expert Committee bad hadien ba u Nongshah thngan (Bah Ardent) ula sangeh, nga sngewsih ban ong ba ha kane ka sngi, ynda ka Expert Committee ka ong ba nangne shakhmat ki Khasi Jaintia bad Garo kin ioh satang 60 % ban iasam bhah bad ha ka por bym pat pynkhih ngi ioh 80%, hangne ngin iohnong ne duhnong” ong u Dr Celestine.

U Dr Celestine ula pyntip ruh ba u MLA barim na Rajabala ruh Dr Azad Zaman ula dawa ruh ba ki muslim rit paid ki dei ban ioh lang 50% naka bhah haba ong ba lada ka Sorkar ne ka Iingbishar ka tuklar, kane ka jingdawa kam bakla satia bad hangne ruh ngin hap pyrkhat la kan pynduhnong ne pyniohnong na kane ka jingleh drama ka VPP.

U Dr Celestine ula pynpaw ia ka jingma kaba ap lada ka Iingkashari ka tuklar ia kane ka kam kaba lah ban khate pynban naka 80% ka bhah sha ka 60% ne 55% haba ong “Ynda kane ka wan jia, phin sa ong ba pleng ka VPP ka ialam bakla”.

Ula ong ruh “Dei hadien ba la don ka jingiatai nia bad jingbalain stad (da ka VPP) ha Iingdorbar Thaw Ain baka Iingkashari kala hukum ban pyntreikam noh mynta ia ka Roster System, kaba baroh shikatta kam ju don satia”.

Halor kine kiei kiei, u Dr Celestine ula ong “Haba ngi dawa ia kano kano ngim dei ban dawa da ka jingsngew (sentiment) hynrei da ka jingstad bad ka bor jabieng khnang ba kino kino ki jingdawa kim dei ban ktah hynrei ki ban seisoh”.