Ther u DyCM | Kut ka ialap elekshon ka VPP da ka jingbein briew bad ieid Jaidbynriew tang ka jynhaw

Ka VPP ka kam ba ieid “Jaidbynriew”, katba ka NPP ka ieid ia baroh ki Nongshongshong

Shillong, Rymphang 08: U General Secretary ka National People’s Party (NPP) bad Symbud Myntri Rangbah ka Jylla Bah Sniawbhalang Dhar ula thalain tyngeh ia u President ka Voice of the People’s Party (VPP) Ardent Miller Basaiawmoit halor ka jingkynnoh ba u shu lapmiet ka bein briew kat ia ba don ha ka jingialap elekshon bad ym map shuh wat ia ki Nongialam Niam.

Haba ialap elekshon ban pan jingkyrshan ia u kyrtong ka NPP na Nartiang-Wahiajer Bah Reforming Son Lamare, u Bah Sniawbha ula ong “Lada phi peit ia ki social media, phin iohi ba u President ka VPP ula shu wad daw lut ia kat kiba don. Ula wad daw pyrshha ia ki Rangbah Shnong, ula wad daw wat ia ki Nongialam Niam ruh…Ngim pat ju iohi ia kum kane ka seng sain pyrthei kaba kren palat na ki kam sain pyrthei”.

Haba pynpaw ba ka don ka jingiapher kaba bak ly bak hapdeng ka NPP bad ka VPP, u Bah Sniawbha ula ong “Ka VPP ka dei ka party kaba kam ba ka ieid “Jaidbynriew” kata ruh tang na suin katba ka NPP ka dei ka party kaba ieid ia ki paid nongshongshnong khlem ka jingiapher iano iano ruh. Kane ka dei ka jingiapher hapdeng jong ki (VPP) bad ngi (NPP). Ka NPP ka dei ka National Party katba ka VPO ka dei tang ka party ha Ri-lum Khasi ka bym don satia ia ka jingiohi jngai”.

Haba kyntu ia ki paidbah ka Ri-lum Jaintia ban ai ka jingkyrshan ba pura ia ka NPP bad ki kyrtong jong ka,u Symbud Myntri Rangbah ula ong “Ka NPP kaba don 33 ngut ki MLA, kala lah ban pynthikna ia ka Sorkar kaba skhem ha Jylla”.

“Nga sngew skhem ba ngin ioh ia ka nam jop na Nartiang constituency hynrei ngi donkam 15 ngut ki MDC ban ioh thaw ia ka EC ha Jaintia Hills Autonomous District Council (JHADC). Kumta, nga kyrpad ia ki paidbah jong ka constituency bad ka ri-lum Jaintia baroh kawei ba kin kyrshan ia ki kyrtong jong ka NPP” ula bynrap.

Kat kum ka jingong jong u, khlem artatien baroh baroh ki kwah ban ioh jaka shong hapoh k abos ha ka jaka ban shong ha tnum bos.

U Symbud Myntri Rangbah ula kam ruh ba ka NPP kala nang khlain na ka sngi sha ka sngi hapoh ka Jylla bad kala trei shitom ban pynthikna ia ka jingjop ha kane ka elekshon ban wan sha ki artylli ki Iingdorbar Thaw Ain ki Autonomous District Council (ADC) ha Ri-lum Khasi bad Jaintia.

“Kynmaw ka Nartiang ka dei ka ktem jong ka NPP. Ngi donkam ia ka jingitylli ban pynthikna ia ka jingjop jong u kyrtong jong ngi. Nga don ka jingngeit bad ka jingsngew skhem ha ki briew jong ngi, kiba la kyrshan ianga haduh lai samoi kynthih ba kin leh lang kumjuh ia une u kyrtong jong ngi” ula ong.

Naor kane, u Bah Sniawbha ula kular ba u kyrtong ka NPP na Nartiang-Wahiajer hadien ba u shah jied, un ai ka jingshakri ia baroh ki paidbah jong ka constituency.

“Watla ki don bun ki kyrtong, kam mut pat ba ki iakhun pyrshah ia nga lane ia phi namar kane ka ju jia beit ha ka kam sain pyrthei. Nga kwah ba hadien ba u kyrtong jong ngi u shah jied, ngin iatreilang na ka bynta ka bha ka miat bad ka jingmyntoi jong ki paidbah ka constituency” ula ong.