Shillong, Lber 19 : U National General Secretary ka NPP bad Symbud Myntri Rangbah ka Jylla Bah Sniawbhalang Dhar, ula ther tyngeh ia ka Liang Pyrshah Voice of the People Party (VPP) namar ka jingkynnoh ba ka Sorkar MDA ka dei kaba bamsap tam.
“Bun sien, ka VPP kam ju pyrkhat hashuwa ban kren bad dei namar kata, la khot ia ka da ka party iew. Kila kynnoh ba kane ka Sorkar ka dei kaba bamsap hynrei ka VPP dalade kaba thied borti ha manla ka jingialang ban lum pisa na ki paidbah” ong u Bah Sniawbhalang haba iakren bad ki nongthoh khubor.
“Nalor kane, u President ka VPP Ardent Basaiawmoit u ju kyrpad ia ki paidbah ha man ki jingialang ba ki dei ban shim beit ia ka pisa bala thong ia ki hynrei ym dei ban ai vote. Mynta kane kam dei ka jingialam bakla ia ki samla bad ia ki paidbah?.Hato ka dei kane ka lynti ban pynshlur ia ki nongthep vote? Mano ba hikai ia ki paidbah ban bamsap, ka VPP ne ka Sorkar?” ula buh jingkylli.
U Bah Sniawbha ula ong baroh ba u Bah Ardent u kren ka dei kaba shisha namar ka Sorkar ka don hangne na ka bynta ki paidbah.
Ula ong ba tang namar ka Sorkar kala wanrah ia ki kam pynroi bapher bapher, kam mut ba kane ka Sorkar ka dei kaba bamsap.”Nga la ju iohsngew bha ba ki pynmih ia ki jingkynnoh. Kumta, lada ki sngew shisha ia kae, ki dei ban ai da ka jingthoh” ula ong.
 namar ka jingkynnoh ba ka Sorkar MDA ka dei kaba bamsap tam.){kind=link}