Shillong, Lber 03 : U Nongialam ka BJP bad MLA ka Pynthorumkhrah Bah AL Hek ha ka sngi Ba-ar, ula pynrem jur ia ka jingkynthoh ba dang shen jong u National Secretari barim ka BJP Sunil Deodhar ha East Khasi Hills, bad ong ba kine ki jingkren kim don jaka satia ha Meghalaya lane ha Ri India kaba burom kumjuh ia baroh.
“Ngi pynrem ia ki jingkren jong u Sunil Deodhar ba dang shen ha kawei ka shnong ha EKHD” ong u Bah Hek haba kren sha ki lad pathai khubor haba pynpaw ba kumno ki Hospital bad ki skul kila ai ka jingshakri ia baroh ki jait niam.
“Ngi don bun ki jaka pule. Ngi don bun ki jaka sumar nongpang kiba shakri ia baroh ki jaidbynriew, ki jingngeit lane ki niam bad ngim pat ju iohi shisien ruh, ne ka khyllipmat ba ki Khristan ki pynkylla niam iano iano. Kumta ka jingkren u Sunil ka long kaba bakla shibun-Nga pynrem jur ia kane ka jingkren” ula ong.
Ula ong ba ka jingburom ia baroh ki niam bad ki briew ka dei ka kamram jong baroh ha kane ka pyrthei bad ong “Ka dei ka kamram bad jingkitkhlieh jong ngi kum ki khun bynriew. Ngim dei ban kren ia kano kano kaba long pyrshah ia kino kino ki niam, ki Jaidbynriew lane ki niam. Ngi dei ban burom lang kumjuh ia baroh”.
U bah Hek ula ong ba u Deodhar um shym la dei shuh u National General Secretary ka BJP bad ula pynlut por da ki snem ha Jylla.
“Ula don hangne la bun snem, ta ka daw ula nang ban kren ia ka ktien Khasi. Tang kane kaba nga tip. U dei na ka RSS. Ngim lah ban kyntait ia kane ka jingshisha”.
