Wat nang ban kdew tang ia ki jingeh, da pyni ruh ia ki lad ban weng ia ki :Titos
Shillong, K’lyngkot 25: U Working President ka United Democratic Party (UDP) bad MDC ka Sohra Bah Titosstarwell Chyne, ula ther tyngeh ia ki katto katne ki Nongialam sain pyrthei kiba nang tang ban pyntieng kohtympan ia u paidbah bad ban pyni tang ia ki jingeh khlem da pyni ne ai jingmut ia ki lad ki lynti ban weng ia ki.
U Bah Titos ula kren ia kane ha ka jingialang paidbah jong ka UDP kaba long ha ka sngi Thohdieng ha Mawkynrew Constituency.
“Ban long Nongialam kam mut ban shu pyrshah beit, ban shu kdew kti beit, bad ban shu leit pyntieng kohtympan ïa ki paidbah, ban shu pyni tang ïa ki jingeh, hynrei haba ngi long ki nongïalam ngi dei ban pyni ba ngi don ïa ka jingkitkhlieh bad kdew ruh ia ki lynti kumno ban pynbeit ïa kita ki jingeh”, ong u Nongïalam ka UDP.
U la ong ba ha kine ki sngi u ïohi ba ki don ki nongïalam kiba shu leit pyntieng ïa ki paidbah, da kaba shu ïathuh tang ïa ki jingeh kat sha ki jaka ba ki leit ialap elekshon.
Ha kajuh ka por, u Bah Titos u la ong ba ka jinglong MDC kam dei ka kam kaba suk nama ka dei ka kamram jong ki MDC haba ki don ha ki district council, ki dei ban thaw ïa ka aiñ ban ïada ïa ka khyndew ka shyiap bad ka riti ka dustur.
“Haba ngi don ha ki district council, haba ngi ïohi ïa ki jingeh, haba ym don ka aiñ halor ka khyndew ka shyiap ngi wanrah ïa ka, haba ngi ïohi ïa ka jingphaloh ha ka jingpynkhih ïa ka riti ka dustur, ha ka kheiñ kur kheiñ kha, ngi wanrah ïa ka aiñ ban buh ryntih ïa ka kheiñ kur kheiñ kha”, u la ong shuh shuh.
U Bah Titos u la ong ba ha ka ilekshon kaba mynta, ka UDP ka dang don ïa ka jingsngewskhem ba kan ïalam ïa ka Executive Committee bathymmai. U la ong ruh ba dei tang ha kane ka samoi treikam ba mynta ba ki MDC ba jop na ka UDP kim shym phet seng.
“Man ka por phi ïohi ïa ki MDC ki kylla rong, teng-teng tang hapoh 5 snem ki kylla uniphom 3-4 tylli, hynrei ha kane ka kynti ym don uwei ruh uba phet seng, 2 snem duna ba ngi shong ha ka Liang Pyrshah ym don uwei ruh u MDC ka UDP ban ryngkoh sha ka seng kaba synshar, namar ba ngi don ïa ki MDC kiba neh bad skhem ha ka nongrim”, ong u Nongïalam ka UDP.
 bad MDC ka Sohra Bah Titosstarwell Chyne, ula ther tyngeh ia ki katto katne ki Nongialam sain pyrthei kiba nang tang ban pyntieng kohtympan ia u paidbah bad ban pyni tang ia ki jingeh khlem da pyni ne ai jingmut ia ki lad ki lynti ban weng ia ki.){kind=link}