Shillong, K’lyngkot 17 : U Symbud Myntri Rangbah ba khmih ia ka Tnad PWD (Roads) Bah Prestone Tynsong ha ka sngi Balang, ula ther tyngeh ia ka rukom treikam jong ka National Highways and Infrastructure Development Corporation Limited (NHIDCL), kaba pyntreikam ia ka surok Shillong-Dawki.
Haba iakren bad ki nongthoh khubor, u Bah Prestone ula ong “Ngim sngewtynnad satia ia ka rukom treikam jong ka NHIDCL”.
U Symbud Myntri Rangbah ula pynpaw ruh ia ka jingkyrshan ba pura halor ka jingiakhih jong ka Joint Action Committee (JAC) ka Riwar Mihngi- ka synjuk jong ki Khlieh Nongsynshar bad ki Sengbhalang- ba long pyrshah ia ka jingsniew palat pud jong ka shurok Shillong-Pynursla-Dawki.
“Nga kmen palat ba ka Synjuk ki Rangbah Shnong lem bad ki Sengbhalang kila wan ban pynpaw ia ka jingpyrshah. Nga tharai kane ka dei kaba bha palat bad nga ruh nga kyrshan namar nga la iohi ia ka rukom treikam jong ka NHIDCL” ong u Bah Prestone.
Kat kum ka jingong jong u, dang shen ha Assam ruh kila mih shibun ki jingujor jong ki paidbah pyrshah ia ka NHIDCL.
Haba kylli kaei kaba ka Sorkar kan leh pyrshah ia kane ka kompani, u Symbud Myntri Rangbah ula ong “Ngan sa khot shen ia ka jingialang bishar kam. Ngan sa iakren bad ki bad ngan sa pyntip sha phi ia kaei kaba mih”.
Ha ka jingiakhih ba shisngi ba long hynne ka sngi, ka JAC ba kynthup ia ka Federation of Riwar Mihngi local dorbar bad ka HANM – kila aipor 20 sngi ia ka Sorkar Jylla ba kan bthah ia ka NHIDCL ha kaban maramot marmar ia ka surok Shillong-Pynursla-Dawki, lem kumta kin ujor da ka PIL ban phah tuklar ha ka Iingkashari Meghalaya High Court. Ka JAC kala dawa ruh ia u Bah Prestone ban hiar shuki kum u MLA lada ym leh eiei ia kane ka surok.
