Shillong, Rymphang 23: U Myntri Rangbah ka Jylla u Conrad K Sangma hynne ka Sngi Nyngkong, ula pynrem jur ia ka jingiben jaidbynriew kaba la jia ha Malviya Nagar, Delhi ha kaba 3 ngut ki kynthei ka jylla Arunachal Pradesh kila shah kren tohmet bad ula ong, ba kane ka jingleh kadei ka bym lah ban pdiang satia bad kala buh pynban ar kam shadien ia ka ri.
“Kane ka jingjia kaba dang shen, ka long ka bym sngewtynnad bad ka bym lah ban pdiang ha kane ka pyrthei kaba mynta. Ki kyntien kiba la pyndonkam bad ka rukom leh ia ka met ka phad (body language) ka long kaba sngewsih bad nga hap ban ong ka long kaei kaei ka bym lah ban pdiang” ong u Sangma haba iakren bad ki nongthoh khubor, ryngkat bad ka banjur ba ha kane ka ri kaba don kyrhai ki jaidbynriew, ka long kaba donkam ban ia burom mar kylliang.
Ula pynthikna ban leh ia kaba donkam bad ban ai jingkyrshan ia kine ki lanot bad ka tyrwa ban shimkhia ia kane ka mat shaduh sha ki kyrdan kiba heh.
“Kumta, nga kyrpad ia baroh ba kane kadei kaei kaei kaba ngim dei ban pynshlur, ha ka jingshisha ki paitbah kidei ban kren pyrshah ia kane. Nga kyrmen ba ki nongialam kiba don ha Delhi bad kumjuh ki nongialam bapher ha kaba iadei bad ki nongialam jong ki jaidbynriew ruh kin shimkhia thikna ia ki sienjam ban pynthikna ba kum kine ki jingjia kin ym jia shuh. Nga pynshlur ban don bun shuh shuh ki prokram ai jingpynsngewthuh ia ki paitbah ha kaba iadei bad kum kine ki jingjia bad khamtam eh na ka bynta ki paitbah ka thain shatei lammihngi, ngi donkam ban kren shaphang kane ban ia kyrshan mar kylliang” la ong u Myntri Rangbah.
“Ki paitbah kidei ban kren beit. Ngam mut ban ong, ban kren sniew ia kiwei pat, ka jingkren ka mut ban kyrshan iwei ia iwei pat, ban pynsngewthuh ia ki paitbah ki bym lah ban sngewthuh ba kum kine ki jingjia kim dei ban jia” ula bynrap.
