Shillong, Naiwieng 27 : Ka Khasi Students’ Union (KSU) kala buh dak jingkylli ia ka jingkynnoh bym leh eiei ka Tnad Ain pyrshah ia u Vice Chancellor ka National Law University (NLU), Meghalaya, u Indrajit Dube wat hapdeng ki jingkynnoh bamsap bad jingpyniaid bakla ia ki kam ka skulbah.
Ha ka shithi bala phah sha u Myntri ka Tnad Ain Bah Lahkmen Rymbui ha ka sngi Palei, ka KSU kala kynnoh ba u Dube ula donkti ha kiba bun ki jingtreikam bymhok, kynthup ka jingjah rngai ka pisa ka University, ka jingthungkam beain bad ka jingpynkhein ia ka Meghalaya State Reservation Policy.
“Ngi la ai sha ki bor ba dei khmih ia ki nongrim kiba khlain halor ka jingbamsap bad jingpyniaid bakla ia ki kam da u VC ka NLU lyngba ki jingshem RTI, ba dei ban weng noh ia ki bad la kular ia ka Seng ba kan thung ia ka jingtohkit bad ia ka kaiphod yn da pyndep hapoh ka arbnai” ong ka shithi ka KSU.
“Hynrei ka por kala iaid la hynriew bnai haduh mynta bad ym shym la leh eiei satia halor kane ka kam bad u VC ka NLU u dang iai bteng haki jingmlien jong u ban thungkam beain bad ki kam bamsap” kala ong haba bynrap “Ka Seng kala ap da ka jingiaishah ia ka Sorkar ba kan shim ia ki sienjam ba leh ia kaba donkam hynrei ka jingbym leh eiei ka Sorkar ia kum kane ka kam ba kongsan ka pyni ba ka Sorkar ka pynshlur ia ki kam bamsap”.
Ka KSU kala kdew ruh ia bun ki kam ba kynnoh bamsap kynthup ka jingpynlut ia ka pisa ba T. 15,10,347 na ki kam leit jingleit shimet, T.3,56,750 na ki jingiadih kyiad, bad jingsiew ba T. 46,83,500 kum ka jingsiew tulop ia ki professor ki bym shym la shim klas.
“Ki don da ki dorjon kiwei pat ki kam bym hok kiba ka Seng kala kdew ha ki shithi barim ha kaba ka jingthungkam ruh la leh ym kat kum ka Meghalaya State Reservation Policy bad u VC u kwah eh ban pynkylla ia ka Reservation Policy khnang ban ailad ia ka jingthungkam paralok ne bahaiing ba kin long ki nongtrei ba pura ka NLU” kala ong.
Ka KSU kala kdew ruh ba halor kane, ha ka jingthungkam ba dang shu dep shen ia u Asst Professor, ula buh ia ki kyndon ba palat pud khnang ban nym don ki kyrtong trai ri trai muluk kiba lah ban aplai, ka ban nang aibor ia ka jingialeh jong u ban pynkylla ia ka Reservation Policy na ka bynta ka jingbha jong ka University.
Ka KSU kala kyntu ia ka Sorkar ba kan leh eiei pyrshah ia u Dube hashuwa ba kan kut ka samoi shakri jong u ha u bnai Rymphang 2026 bad ban pynthikna ba ym dei ban ailad ia ki kam bamsap.
“Ka Seng ka kwah ban ban jur ia ka nongrim ba u Indrajit Dube um dei ban ioh trei biang hadien ba kut noh ka samoi treikam jong u ha u Rymphang, 2026 bad kat kum ka Act, u VC ba nyngkong u lah ban bat ia ka Ophis ym palat ia ka 3 snem” kala ong haba dawa ia ka Sorkar ba kam dei ban shu sngap ia ki kam bamsap hynrei ban leh eiei pyrshah ia u VC ka NLU kaba la pynshong nongrim kat kum ki jingshem RTI.
 kala buh dak jingkylli ia ka jingkynnoh bym leh eiei ka Tnad Ain pyrshah ia u Vice Chancellor ka National Law University (NLU), Meghalaya, u Indrajit Dube wat hapdeng ki jingkynnoh bamsap bad jingpyniaid bakla ia ki kam ka skulbah.){kind=link}