Shillong, Rymphang 17 : Ka Nongaiikten ka All India Congress Committee (AICC) Alka Lamba hynne ka sngi thohdieng kala thalain tyngeh ia ki Nongialam ba hakhliehduh ka BJP bad Myntri kam Pohiing Amit Shah namar ka jingpynman ia ka Meghalaya kum ka Jylla ba jur tam ki kam bamsap ha ka Ri.
Kala buh jingkylli ruh ia ka rai jong ka Party ban ai ticket ia u MDC ka Tura Bernard N Marak, uba shah kem halor ka jingkynnoh pyniaid ia ka jaka khaii met, ba un iakhun na South Tura.
“Nga kwah ban ong ia u Amit Shah ba ka Meghalaya kam dei kaba bamsap. Ka Sorkar Meghalaya kaba phi long u Dkhot ka dei kaba bamsap. Ngi kwah ban kylli ia u Amit Shah ia kane ka Jingkylli kaba ula iaid kiar man ka por” ong ka Lamba haba iakren bad ki nongthoh khubor.
Haba kren halor ka case u Bernard, kala ong “Ki Kynthei bad ki Khynnah kynti ka Meghalaya ki kwah ban tip haba phi kam ban iada ia ki Kynthei bad kren halor ka ‘Beti Bachao Beti Padao’ phi ai ticket pat ia u briew uba shah pynngat ha ka POCSO. U briew uba la tip ia ka jingpyniaid jaka awria ha Meghalaya bad ula phet sha UP kaba ula shah kem bad shah set along, ha ka jaka phin weng ia u n aka party, phi la ai pynban da ka ticket ban iakhun na ka BJP”.
“U Myntri Rangbah Duh u hap ban jubab ia kane ba kumno phi kam ban iada ia ki Kynthei haba phi wanrah ia kum kine ki briew kiba thombor ia ki Kynthei ba kin mihkhmat ia ki paidbah ka Meghalaya?. U Modi, Shah, Irani kin hap ban jubab ia ki paidbah ka Meghalaya, ki Kynthei ka Meghalaya, ia ki khynnah kynthei ka Meghalaya” ong ka Lamba.
Haba pynpaw ba ka MDA kala kylla long “Meghalaya Damaging Alliance”, kane ka Nongaiktien ka AICC kala ong “Katto katne ki party tang namar ka jingrhah bad myntoi shimet, kila iapein ia ka bha ka miat ki paidbah bad ialam ia ka Jylla naka roi ka par sha ka jingjot”.
Kala ther ruh ia ka MDA halor ki jyrsieh bapher bapher ba kynthup ia ka jingkhyllem u Dome ka Assembly ba T. 816 klur, ka jyrsieh Covid, ka jyrsieh MUDA ba T. 500 klur, ka jyrsieh Soubhagya ba T. 149 klur bad kiwei kiwei.
Kane ka Heh AICC kala kynnoh ba ka Sorkar BJP kala nang pynjur ia ka jingiapthngan hapoh ka Ri bad ka India mynta kala don ha ka kyrdan ba 107 na ki 121 tyllki Ri. Ka Ri India ka don hatrai jong ka Srilanka (64), Nepala (81), Bangladesh (84), bad Pakistan (99).
“U Modi ula niew ia ka jingiarap song pisa ia ki paidbah ba duk kum ka rewadi katba u Amit Shah ula kular ban kyrshan ia ki paidbah ka Meghalaya ha ka dur jong ka jingsiew sha ki Longkmie ba khlem lok. Hatp kane kam mut ia ka jinglong arsap? Ha kaei ka liang phi pynman kam kai ia ki song jingiarap katba ha kawei pat ka liang phi ai ki jingkular ha ka manifesto kaba pyni shai ba yn ym don kawei ruh na ki jingkular jong ka BJP ka ban urlong”.
“Ka BJP kala kam ba ka dei ka sorkar double engine hynrei ka jingshisha hi ka dei ka sorkar double trouble. Ka double trouble ka dei ka jingbymiohkam iohkam bad ka jingkiew dor ki mar ki mata” kala bynrap.
Haba pynpaw ia ka jingsngewskhem baka Congress kan wan phai biang ha ka bor ha Meghalaya, ka Lamba kala ong ba ka congress ka dei ka kaba biang eh bad tang ma ka hi kaba biang eh hangne ha Meghalaya.
