Ther tyngeh ka BJP ia u Chief Adviser ka Bangladesh ba kynthoh pynma ia ka thain NE

0
39
Muhammad Yunus

Shillong, Iaiong 02 : U Nongialam ka BJP bad Myntri Sorkar bah A.L.Hek ha ka sngi Balang, ula ther tyngeh ia u Chief Advisor ka Sorkar ba shipor ka Bangladesh Muhammad Yunus namar ka jingkynthoh pynma ia ki Jylla ka thain Shatei lam Mihngi ka Ri India ha ka jingleit iuhkjat jong u ha China.

U Yunus ula ong “Ki hynniew tylli ki Jylla ka India, kiba don sha ka thain Lam Mihngi ka Ri, ki dei kiba la khot ki Seven Sister (ki 7 ngut ki shipara). Ki dei kiba don ha ka thain ka bym don lynti iaid jongka India. Kim don jaka ban poi sha ka duriaw. Ka Bangladesh ka dei ka “Nongkhmih ia ka duriaw” ia ka thain. Kane ka plie ia shibun ki lad. Kane ka lah ban dei ka jingpyniar ia ka ioh ka kot ka China”.

Haba kynthoh ia kane, u Bah Hek ula ong ba ka Sorkar kan nym ailad satia ia ki bor ba nabar ban wan tuklar bad ki kam pohiing jong ka Ri khamtam ia ka thain Shatei Lam Mihngi.

“Ngin nym ailad ia ki bor ba nabar ba kin wan tuklar ia ka Ri jong ngi khamtam ha ka thain Shatei Lam Mihngi. Balei ngin ailad ia ki biew ba nabar ban wan tuklar?” ula buh jingkylli.

Une u Myntri ula ong ruh ba ki jingkynthoh jong une u Nongialam ka Bangladesh ka dei ka bym lah ban shu shah.

Haba kylli, u Bah Hek ula ong “Shibun ki shithi kila leit. Balei ba ngin nang thoh ? Ngi ia im suk hangne. Lada don kano kano ka jingeh ba mih na ki bor ba nabar hangta ngin sa thoh hynrei kim pat don ki bor ba nabar kiba wan thombor ia ka Jylla jong ngi ia mynta”.