Ther ki Heh NPP ia ka VPP ba riej ban sei sakhi ia ki jingkynnoh bamsap ia ka Sorkar

Ka NPP ka ieid Jaidbynriew da ki kam ym ban shu kyrhuh kum u laren

Shillong, Rymphang 17 : U Nongialam ka NPP na Mawphlang constituency Bah Auspicious Lyngdoh Mawphlang ha ka sngi Nyngkong, ula ther tyngeh ia ka Liang Pyrshah Voice of the People Party (VPP) namar ka jingbym lah ban sei ia ki sakhi satar ban pynshisha ia ki jingkynnoh bamsap pyrshah ia ka Sorkar MDA ba ialam da ka NPP.

“Ka VPP bad ki Nongialam jong ka kila iai kynnoh ba ka Sorkar ba ialam ka NPP ka dei kaba bamsap hynrei kine ki dei ki jingkynnoh ba khlem nongrim naba kim shym la lah ban sei ia ki sakhi satar ban pynshisha ia kine ki jingkynnoh” ong u Bah Auspicious haba kren ha ka rynsan ialap elekshon ha Iew Pynursla ban pan jingkyrshan ia ki kyrtong ka NPP-Kong Grace Mary Kharpuri na Nongshken bad Bah Rahboklang Tynsong na Langkyrdem-Laitkroh.

“Wat hapdeng kine ki jingkynnoh, ngim shym la iohi ba ka VPP kala leit ujor wat tang kawei ka PIL ne ka ejahar pyrshah ia kano kano ka tnad ne ki Myntri jong ka Sorkar MDA-I bad II. Kane ka long namar ba kim don ia ki sakhi satar ban pynshisha ia ki jingkynnoh pyrshah ia ka Sorkar NPP kaba lah ban pynkut ba ki shu kwah kynnoh khlem nongrim” ula kynnoh.

Haba pynkynmaw ba ka People’s Democratic Gront (PDF) kala leit iasoh bad ka NPP halor ki kam ba bha jong kane ka Sorkar ba mynta, une u Nongialam barim ka PDF ula ong “Ka VPP kala kynnoh ruh ba ka NPP kam dei satia kaba ieng na ka bynta ka jaidbynriew hynrei nga kyrpad ia phi ban bishar ia ki kam babha jong ka party naduh ka por ba ka shimti ia ka Sorkar ha u 2018”.

Ula ong “72 tylli ki snem kila iaid, ka Congress, UDP, PDF ha ki manifesto ha ka por elekshon kila kular ba lada ki wan ha ka bor kin pynbeit ia ka jingiakajia pud. Mano bala shim ia ka rai ba satar ban pynbeit ia ka jingiakajia pud ba kad Assam kaba la sahteng la slem slem bha, hato kam dei ka Sorkar NPP. Hynriew tylli ki jaka ba iakajia pud na ki 12 tylli, la dep ban pynbeit mynta bad la iasoi ruh ia ka soskular hapdeng ka Meghalaya bad Assam ha ka jingiadonlang u Myntri kam Pohiing ka Ri ha Delhi, ha u snem 2022. Sa hynriew tylli yn sa pynbeit noh shen bad ka Meghalaya kan sa ioh noh iala u pud u sam uba thikna. Hato kam dei ka NPP kaba pynurlong ia kane mynta”.

“Kumjuh ruh haba iadei bad ka CAA, kaba ai long nongshongshnong ia ki poi wir, ka dei ka NPP kaba ialam ia ka kynhun sha Delhi ban pyllait ia ka Meghalaya na kane ka Ain. Haba kumta, mano ba ieng na ka bynta ka Jaidbynriew, kam dei mo ka NPP?. Halor ka jingpynbn EIA 2020 ban pynjngai ia ka khappud da 5 Km, hangne ruh ka dei ka NPP kaba la khang ban pyntreikam ia kane ka jingpynbna ha Meghalaay. Ka dei ka NPP ka bym shym la rieh na ki jingkitkhlieh da kaba wanrah ia ka resolution ban kyrpad ia ka Sorkar Pdeng ban pyntreikam ia ka ILP, pynrung ia ka ktien Khasi. Hato kine kim dei kiba la leh na ka bynta ka Jaidbynriew” buh jingkylli u Bah Auspicious.

Ha kawei ka liang, u Bah Egenstar Kurkalang ula ong “Ka VPP ka triem eh tang ban kynnoh bamsap ia kiwei hynrei kim pat ju ai kaiphod satia ba haduh katno kila lum pisa na ki paidbah na man ki jingia lang paidbah. Hato phi la ioh kaiphod halor kane?. Ki tbit eh ban kynnoh ia ki watla ka Sorkar kala leh man ki kam kiba donkam da ki nongshongshnong la ka dei ka jingsam marbam, ki skhim, ka umbam umdih bad kiwei kiwei”.

Haba pynpaw ba ka Pynursla kaba sakhi ia ka jingwan bun bah ki kam pynroi ha kine ki 7 snem bala leit, ula ong “Ngim lah ban ianujor ia ka jingioh kam pynroi mynta bad ki snem bala leit noh. Kumta, nga kyrpad ia ki paidbah ba kim dei ban sngap ia ka party kaba pnah tang ka ktien”.

Haba khein ia ka VPP kum ka seng pyrshah Sorkar bad seng pyrshah kam pynroi, u Bah Egenstar ula ong ‘Wat hapdeng ki jingkam ba don bun ki professor bad ki stad ki jhad kum ki dkhot hynrei sngewsih ba ym pat ju don kawei ruh ka jingai jingmut jong kane ka party kaba la poi sha ka miej jong ka Sorkar. Kam shym la lah ban ai jingmut halor ka kam pule dangle,ka iohkam iohkam hynrei ki kloi pat ban iahylla bad pynlong tamasa ha ki surok”.

“Khie leit bad kylli ia ki paidbah jong ki saw tylli ki constituency, phin sa tip kumno ki (MLA ka VPP) kim kwah ban wanrah ia ka roi ka par laitnoh tang ki jingialam bakla bad jingkam thok. Kane ka pyni ba ka dei ka party ka bym tip shano ban leit. Ki kwah ban leh kat kaba ki sngewbit” ula bynrap.