Shillong , Naiwieng 25: Ka Meghalaya and Greater Shillong Progressive Hawkers and Street Vendors Association (MGSPHSVA) kala kynthoh tyngeh ia u ADC ka East Khasi Hills uba long ruh u Secretary ka Provisional Town Vending Committee (PTVC) halor ka jingpynmih ia ka jingpynbna paidbah ha ka 14 tarik u Naiwieng, kaba kynnoh ba ym shim la kynthup ia bun ngut ki nongshong dukan madan ha ka thain Shillong Civil Hospital khlem da don kano kano ka jingiakren hapoh ka PTVC.
Ha ka kyrwoh bala pynlait hynne ka sngi Nyngkong, ka MGSPHSVA kala ong, “Haba la leh ia ka “in-situ survey” ha kylleng ka nongbah Shillong ha u Nohprah 2023, kala ioh tang 29 ngut ki nongdie madan ha ka thain jong ka Civil Hospital watla ki don kumba 43 ngut eiei ki nongdie madan kiba dei hok bad kiba shong die jingdie la bun snem”.
“Ka thup kaba ka SMB kala pyllait paidbah hadien ba la dep leh ia ka Survey ha Shillong, ha ka 27 tarik u Jymmang 2024, halor ki nongdie madan kiba dei hok ha ka thain Civil Hospital, watla ym shim la iaid ha ka lynti ban don ka jingkam ne jingpyrshah (claims and objections) ka kynthup tang ia ka kyrteng jong ki 14 ngut, khlem da ai pat ia ka daw jong ka jingkyntait ne bym kynthup ia ki nongdie madan kiba dei hok. Palat ia 50% na ki nongdie madan kiba la dep shah khmih ha ka survey, nuksa kumba 15 ngut kila shah weng khnang bad ym shim la ai ia ka lad ban iashimbynta ha ka jingkam ne jingpyrshah”kynnoh ka MGSPHSVA.
Ka Association kala kynnoh da kaba ong, “Ka jingpynmih ia ka jingpynbna kaba dang shen ha u Naiwieng 2025 ka kynthup tang ia ka kyrteng jong ki 12 ngut bad ruh ia ka kyrteng jong ki katto katne ki briew ki bym shim la dep leh ia ka Survey”.
Kala dawa “Ha ka jingkam ne jingpyrshah (claims and objections) dei ban kynthup ia baroh 15 ngut ki nongdie madan kiba la shah khmih bniah hynrei la kyntait khnang ia ki ryngkat lang bad ia ki 14 ngut ki nongdie madan kiba la shah iehnoh ha ka jingleh Survey bad baroh ki don 29 ngut ki nongdie madan kiba dei hok kiba la shah iehnoh bakla, na ki 43 ngut ki nongdie madan kiba shong die jingdie da ki snem ia kaba la buh khnang ban pyntreikam ia ka Street Vendors Act 2014.”
“Khlem ka jingkam bad jingpyrshah kaba khuid bad kaba shai kdar, ym dei ban ai lisen iano iano ruh namar ba ka lah ban plie lad ia ka bamsap, ka jingbym ai ia ka hok bad kaj ingpyndonkam bakla ia ka bor” la banjur ka seng ki nongdie madan.
Ka MGSPHSVA kala pyntip ba kala dep ban leit jurip lang ia ka jaka kaba thmu ban pynshong shipor ia ki nongdie madan, katba ia ka jaka hajan ka Civil Hospital kadei kaba dang tei.
Ka Association kala kren shai “Ba dei ban don ka jingiasoi ia ka MoU da kaba pynpaw ba ka jaka kaba kin shong kadei kaba tang shipor katba ia ka jaka kaba yn shong shirta ha Civil Hospital kan dei kaba dang shim por. Ki nongdie madan kin kynriah hadien ba la pyndep ia ka jingtreikam ka MOU kaban iatreilang da baroh ki nongdie madan katei ka thain bad hadien ba la pyndep ruh ia ka jingkam bad ka jingpyrshah kaba pura na ka bynta baroh ki nongdie madan kiba dei hok ha katei ka thain”.
Ka Association kala iengskhem ba kam shim la don kano kano ka jingiakren ha kaba iadei bad ka jingpynmih ia ka jingpynbna ha ka 14 tarik u Naiwieng bad kam shim la don kano kano ka jingshim rai hapoh ka jingialang jong ka PTVC bad kala buh jingkylli kumno u Secretary ka PTVC ula pynmih ia katei ka jingpynbna paidbah kaba kynthup ia ka kyrteng jong ki briew ban wan mih hakhmat jong ka Committee halor ka jingkam bad jingpyrshah (claims and objections).
“Kam shim la don kano kano ka jingiakren halor kane ban buh ia kum katei ka Committee ne ban iakren shaphang ka rukom pyniaid ia kane ka kam bad ban buh ia ka tarik ha ka PTVC,” la pynpaw ka MGSPHSVA.
 kala kynthoh tyngeh ia u ADC ka East Khasi Hills uba long ruh u Secretary ka Provisional Town Vending Committee (PTVC) halor ka jingpynmih ia ka jingpynbna paidbah ha ka 14 tarik u Naiwieng, kaba kynnoh ba ym shim la kynthup ia bun ngut ki nongshong dukan madan ha ka thain Shillong Civil Hospital khlem da don kano kano ka jingiakren hapoh ka PTVC.){kind=link}