Shillong, Nohprah 19: Ka Meghalaya Pradesh Congress Committee (MPCC) kala kynthoh tyngeh ia ka Sorkar Pdeng kaba la ialam da ka BJP namar ka jingpynkylla ia ka skhim Mahatma Gandhi National Rural Employment Guarantee Act (MGNREGA) bad maham ba kan don ka jingktah kaba jur ia ki shnong ki thaw kiba don ha nongkyndong.
“Ka BJP ka pyrshang ban pyntroin ia ka jingthmu jong ka MGNREGA, ka jingthombor kaba ym lah ban map shuh halor ka hok jong ka imlang sahlang, ka riti synshar ka ri bad ia ki paitbah kiba duk na kiba duk tam” ong u Secretary ka MPCC u Bah Manuel Badwar haba iakren bad ki nongthoh khubor ha ka sngi Palei.
Kane ka jingpynkylla kaba thymmai ka long ban shim noh ia ka bor na ki paidbah ban ai sha ka sorkar, da kaba iuhroit ia ka jingtrei shitom bad ia ka jingsynshar laitluid ki shnong ki thaw.
Ula kynnoh ba kane ka jingleh kan lam sha ka jingpynduna ia ka jingai kam bad ia ka jingbhah ia ka tyngka, kaban ktah ia ki 15 lak ngut ki paitbah ka jylla Meghalaya, ka jingkiew jong ki kam shimkabu ia ki nongbylla, khlem da don kano kano ka jingiohi jngai jongka sorkar, ki khynnah kin hap ban ieh noh ia ki skul ban leit bylla, ban pyniar ia ka jingduk, ka jingshah pynngam ki longiing na ka jingshim ram, kaban buh ha ka jingma ia ka kamai kajih bad ia ki jaka ki puta bad ka jingshim ia ka rai da kaba kyntait ia ka jingdonkam ha ki shnong ki thaw.
U Bah Badwar ula kyntu ia ki seng riewlum ba kin iashimbynta lang ha ka jingiakhih bad banjur ba kane kadei na ka bynta ka jingkamai jakpoh jong ki phew lak ngut bad kam dei satia ka politik.
“Kane kam dei ka jingleh politik, hynrei kadei eh na ka bynta ka kamai kajih jong ki phew lak ngut ki briew kiba shong ba sah hapoh ka jylla Meghalaya” ula ong.
