Shillong, Naiwieng 23 : U Nongialam ka All India Trinamool Congress (AITC) bad Myntri Rangbah barim Dr Mukul Sangma hynne ka sngi balang, ula ther tyngeh ia ka Sorkar Pdeng namar ka jingbym sngewthuh ia ka jingdonkam ki Jylla ka Thain Shatei Lam Mihngi ban pynneh ia ka shongsuk shongsain.
Haba iakren bad ki nongthoh khubor, u Dr Mukul ula iathuh ba ki jingtyrwa bala aiti da ka Sorkar Meghalaya bad kiwei kiwei ki Jylla sha ka Ministry of Home Affairs (MHA) ban buh ia ki Police Station ha ki jaka khappud hapdeng ki Jylla, kala shu sop pum pum.
Kane ka jingkynthoh kala mih hadien ka jingshah siat iap haduh 6 ngut ki briew ha ki Pulit Assam hynnin ka step sngi ba-ar ha Mukroh, West Jaintia Hills.
Haba pynpaw ha ka jingshongshngain hapdeng ki Jylla ka dei kaba donkam ban pynthikna ia ka jingkiew shakhmat jong ka thain, u Dr MUkul ula ong baka jingkitkhlieh ia kane ka shong ha ki Sorkar Jylla hynrei ha kajuh ka por ruh, kiba bun ki Jylla kim don ia ka bor ban bei tyngka ha kaban pynieng ia ki Thanad Pulit ha ki jaka khappud.
U Dr Mukul ula pynpaw ruh ba ki don shibun ki jingtyrwa kiba ula shimkhia ban phah sha Delhi ha ka por ba u synshar ia ka Jylla hynrei ka Sorkar Pdeng kam shym la ai jingmynjur.
Ula pyntip ba ki don ruh shibun ruh ki jingtyrwa bala phah sha ka Sorkar Pdeng ban kyrshan ia ki Jylla ka Thain Shatei Lam Mihngi la shu pynsangeh noh bad kine ki kynthup ia ka Special Assistance sha ki Jylla ka thain.
Ula ong ba dei namar kine ki daw ba ki Jylla ka thain kila sakhi ia ki jingjia kum ka jingjia ther kuli ha Mukroh.
