Shillong, Rymphang 1 : I Nongaiktien ka National People’s Party (NPP) kong Ampareen Lyngdoh, hynnin ka sngi ba-ar ila ther tyngeh ia u Dr Mukul Sangma halor ka kam iapynbeit pud bad ka Assam bad kyntu ruh ba um (Mukul) dei ban pyrshang ha kaban shukor ia ki paidbah.
I Kong Ampareen ila ong ruh ba ka kam ba nyngkong eh jong ka Sorkar ban wan lada ioh thaw Sorkar ka NPP, ka long ban shon muhor noh ia ka soskular iapynbeit pud bad ka Assam
“Ka MoU kam pat dei kaba la iasoi pura namar ka dang don kata ka jingbym sngewhun hapdeng ki paidbah kiba sah ha ki jaka khappud hynrei nga kular ba ha u 2023, ka kam ba hakhmat eh jong ka Sorkar ban wan ka long ban shon muhor ia ka MoU” ila ong haba iakren bad ki nongthoh khubor.
Haba ther tyngeh ia u Nongialam ka AITC Dr Mukul Sangma halor ka jingkam ba un shong bishar thymmai biang ia ka soskular khappud, ine I MLA ka East Shillong ila ong ba ka Congress kam shym la lah ban pynbeit ia ka jingiakajia khappud baroh shikatta ka dei namar ka daw ba une u briew (Dr Mukul) u dei u Nongialam.
“Une u juh u briew, mynta u ong, ngi pynkylla ia ka MoU bad ba un shong iapynbeit thymmai ia ki jingeh ha khappud…Phim lah ban pyrshang ha kaban shukor ia kum kane ka kam kaba eh bha” ila ong.
“Kaei ka jingbym biang ha kane ka jingiakren ba dang iaid mynta?. Kum u Nongialam phi lah dei ban leit sha ka jingialang jong ki Committee, ki Regional Committee ki don, ki jingshong bishar ki don, phi dei u dkhot ka Iingdorbar bad phi dei u Nongialam ka Liang Pyrshah, phi don bun ki lad ban iakren ia kane ka kam. Hynrei ban shu ong ba kane ka kam ka dei kaba la leh da kiwei ka long kaba bakla. Nga ong ba phi dei ban pyndonkam ia ka rynsan kaba dei ha kaban kren ia ki jingduna khnang ban lah pynbeit ia ki jingbymbiang” ila bynrap.
Haba khein antad ba ka AITC kan nym paw than ha u 2023, ila ong “Ai ba kan dep shuwa ka elekshon. To ngin iatrei bad ngin sa peit ia kaei kaba ngi lah ban leh bad kaei kaba hap ban leh. Hynrei, wat pynlong ishu ia ka kam khappud. Phi kynmaw ba ngi la iatai sani bha ia kane ka kam ha Iingdorbar. Ka Iingdorbar ka dei ka rynsan kaba la ailad ia baroh. To ngin ia ap bad ia peit.
Haba ban jur ia ka jingdonkam ban iada ia ka Meghalaya na ka AITC, ine I Nongialam ka NPP ila ong “Kane ka dei ka slogan, ngi dei ban phikir bha ia (TMC) namar shisha ngim don jingtip eiei shaphang ka TMC bad dei kane ruh ka daw bah ba nga khlem leit sha ka TMC”.
Haba pynpaw ia ka jingdonkam ban da bishar bha, ila ong baka We Card bad MYE Card ba kular da ka AITC kan ym treikam satia namar ka jinghap pynlut da ki klur ha ka shibnai.
“Ngi la khein bha..lehse ka lah ban kot sha ka T.400 klur (shibnai ne shisnem). Ta ka daw ka long kaba eh ban pynurlong ia kum kine ki jingkular” ila ong haba bynrap “Ka NPP ha kawei ka liang kam shym la kular eiei, kala pyni da ka kam. Kala leh ia kaba donkam bad dei namar kata ba ki briew kum ma ngi, ngi la leit sha ka NPP”.
