Shillong, Naiwieng 01: Ka Myntri ka tnat ka koit ka khiah ka Kong Ampareen Lyngdoh kala iathuh ba ki don 7 tylli ki Company kiba la wan shakhmat ban thep Tender naka bynta ban ioh pyniaid iaki kali kit nongpang 108 Emergency Service hapoh Meghalaya.
Haba kren sha ki lad pathai khubor ka kong Ampareen kala iathuh ba haka 31 tarik u Nailar, ki nongtrei 108 kila wan kynduh ban buddien halor ka jingthmu ban pyniaid daka Company thymmai iaka 108 Emergency Service hapoh ka Jylla bad haka jingialang kila pynpaw ba ka sorkar kadei ban pynthikna ban iada iaki nongtrei.
“Haka jingiakynduh bad ki nongtrei 108, kila pynpaw bad kila kyntu iaka sorkar Jylla ba kano kano ka Company kaba wan shimti ban pyniaid iaka 108 Emergency Service hapoh Meghalaya, kadei ban iada ia ka hok ki nongtrei bad kadei ruh ban khmih ruh iaka bha ka miat jong ki” la ong ka Kong Ampareen.
Haba kylli halor ka jingiaid lynti ban ioh da ka Company thymmai ban pyniaid iaka 108 Emergency Service hapoh Meghalaya, ka Kong Ampareen kala ong “Haka jingshisha ka tnat ka koit ka khiah ka kyrmen ban pyndep iaka jingthep Tender mynta ka sngi hynrei ki don katto katne ki Company kiba la pan por biang ban bishar iaki jingdonkam”.
“Baroh ki Company kiba thep iaka Tender naka bynta ban ioh pyniaid iaka 108 Emergency Service hapoh Meghalaya, ki kular ban kyntiew iaka tulop man u snem, ban siew Insurance, ban siew lada ki nongtrei kin ngat haka aksiednt, ban siew ka bai sumar lada ki ioh pang” kala ong,
Nalor kane ka Myntri ka tnat ka koit ka khiah ka pyntip ba ki nongtrei ki donkam ban leh iaki Test ban iohi iaki sap ba ki don bad hadien kane yn sa lah ban thepkam iaki katkum ki sap bad ka jingkot bor ban trei ha ki tnat bapher bapher jong ka 108 Emergency Service.
Pule lang ia kane: Hukum ka Iingkashari ban set along haduh 14 snem ia 2 ngut ki Nongleh beijot
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
