Shillong, Rymphang 06: U President ka Bharatiya Janata Party (BJP) Meghalaya u badei ruh u kyrtong na West Shillong constituency u bah Ernest Mawrie ula kynnoh ba ki don shi bun ki jingduna hapoh ka konstitwensi.
Ia kane u bah Ernest ula ong hadien ka jingwan thep kyrteng ban ïakhun ïa ka elekshon ka ban sa long ha ka 27 mynta u bnai.
Haba kren sha ki lad pathai khubor u bah Ernest ula kam naduh ba ula sdang ban ïaid ialap elekshon hapoh ka constituency ula ïohi ba don shibun ki jingduna bad dei namar kane ula shim iaka rai ban iakhun ha kane ka elekshon naka bynta ban wanrah jingkylla hapoh ka constituency baroh kawei.
U bah Ernest ula iathuh ba u la kynduh ïaki paidbah hadien ba ula rung ha ki thliew ïng bad ula ïohi lut ïa ki jingdonkam bad jingduna jong katei ka constituency bad lada ki paidbah ki i bit ïa u, u don shibun kiei kiei ban leh na bynta ki paidbah.
“Kumba ngi tip ba ka thain West Shillong ka jyllei bha ki kam Droks bad na ka liang ka party ka ïeng bad ka pyrshah ïa kane, ym dei ba ngi pyrshah ïa kita ki nongdih droks hynrei ka kwah ban pynduh jait ïa kane khnang ba kan nym don shuh ka jingdie bad ka jingdih droks ha kane ka thain” la ong u bah Ernest.
U Bah Mawrie u la ong ruh, ba u la ïohi mynta ba ki nongshong shnong jong ka 18 West Shillong constituency i ki kwah ban ïohi ia ka jingkylla, ki paidbah ki la phai khmat sha baroh bad ki la ailad hynrei ha kane ka kynti u khmih lynti ba ki paidbah kin ailad ïa u ban pynjop na ka BJP.
Ula ong ba ka Party ka kwah ban wanrah shisha ïa kata ka jingkylla ha baroh ki bynta naduh ki surok, ki Medical College, Engineering College lane ban wanrah ban pynbeit ïa kata ka jingkyrduh kam ki samla.
Nalor kane u president ka BJP Meghalaya ula ong ba baroh arngut ki MLA ka BJP ha u snem 2019 kila mynjur iaka jingdawa pyntreikam Inner Line Permit (ILP) bad naka liang ka party ha ryngkat bad ka Khasi Authors Society (KAS) kila leit sha nongbah Delhi ban dawa pynrung ïa ka ktien Khasi-Jaintia hapoh ka 8th Schedule.
