Nongpoh, Rymphang 7: Lai ngut ki kyrtong na Jirang Constituency kiba kynthup ia u Bah Lee Bareh u kyrtong shimet, Riya Sangma kyrtong ka BJP bad ka Kong Seremina D Marak kyrtong ka Republican Party of India RPI kila pyndep ia ka jingthep kyrteng kum ki kyrtong ban iakhun ha kane ka elekshon MLA ban long la 27 tarik Rymphang.
Haba kren sha ki lad pathai khubor, U bah Lee Bareh u la ong, hadien ka jingduh noh iaka ticket naka BJP ki paidbah ki la ai ka jingkyrshan kaba pura ba u dei ban iakhun kum u kyrtong shimet, bad ka thong kaba u buh ha khmat eh u la ong ba un trei shitom ha kaba iadei bad ki khappud, ki jaka pule naduh ki klas kiba rit bad kaba kongsan eh u la bynrap ban phai khmat kyrpang sha ki kam jong ki nongrep.
Ka Riya Sangma ka la ong ba kum ka kyrtong ka BJP ka kwah eh ban wanrah iaka roi ka par hapoh ka constituency.
Haba ki nongthoh khubor ki kylli halor ka jingkynnoh ba kam dei ka nongshong shnong jong ka Meghalaya hynrei Assam, ka la jubab ba ka don lut ki kot ki sla ban pynshisha ba ka dei ka nongshnong shnong jong ka Jylla meghalaya.
Naka liang ka Seremina D Marak ka la ong ba ka la don bynta ha ki jingiakhih haba iadei bad ki jingia kajia pud hapdeng ka Assam bad Meghalaya, bad ka thong jong ka ban iakhun ia kane ka election ka long beit halor ka nongrim ban iada iaki paidbah jong ka jylla meghalaya kiba don ha ki khappud.
