Shillong, Naitung 06 : Ki Pulit ka East Jaintia Hills kila thep case hi dalade (register suo motu case) hadien ka jingiap jong uwei u briew namar ka jingkynnoh pynbthei bomb dynamite ha kawei ka par dewiong ha East Jaintia Hills.
U Superintendent of Police Vikash Kumar ula pynthikna ha ka sngi Ba-ar ba tang uwei u briew ula iap bad la ithuh kum u Ashok Tamang, uba la khlad na ka jingpdung hi hapdeng ka jingsumar ha Shillong Civil Hospital.
Ula bynrap ba ki Pulit kila register ia ka suo motu case hapoh ka kyndon 105 jong ka Bharatiya Nyaya Sanhita (BNS) halor kane ka jingjia.
“Haba pynshong nongrim ia ka jingpyntip shuwa ban iap jong u Ashok Tamang…ngi la register ia ka suo motu case hapoh ka kyndon 105 BNS” ong une u Heh Pulit uba pyntip ba ka jingtohkit mynta ka la iaid shakhmat ban pynthikna ruh ia ka jaka ba jia kane ka jingbthei bomb bad kiwei kiwei.
Ula pyntip ba u Tamang shuwa ba un iap ula iathuh “Hashuwa ka jingiap, ula pyntip hakhmat ki doktor ba u dei uba peit ia ka jingpynbthei bomb dynamite ha ka jaka trei, hynrei u khlem palat ia ka jaka lane kumno ka jia. U khlem kren eiei shaphang ka jingtih dewiong, ula iathuh ba kane ka jingjia kala jia ha ka jaka trei jong u”.
Haba kylli, u SP ula ong “Hooid, ka Committee u Justice BP Katakey kala pan ia ka kaiphod halor kane ka jingjia. Ngin sa ai ia baroh ki jingtip namar ki don artylli kiei kiei halor kane ka kam-ka video bad ka jingiap jong u Ashok Tamang. Ngin hap ban shong bishar ia baroh arbynta namar kine ki dei kiba jia la la ka jong”.
Halor ka jingkynnoh ba ka video ka don jingiadei bad ka jingjia ha shnong Thangsko, u Kumar ula ong “Kat kum ka jingleit tohkit, kam dei satia na kane ka shnong…u Rangbah Shnong bad kiwei ki nongkitkam ka shnong Thangsko kila pyntip ba kim ithuh satia ia kine ki briew ha ka video, u nongkren lane ka jaka. Ngim lah ban pynthikna ba ka jingbthei dynamite ka jia ha katei ka jaka”.
Ka jingtohkit ki Pulit ka iathuh ba ia u Tamang la ialam ban leit sumar nyngkong ha Sutnga Community Health Centre (CHC) ha ka 23 tarik Nohprah 2025 ryngkat ki dak ing. La pynkynriah ia u hadien sha Shillong Civil Hospital bad ula khlad noh ha ka 1 tarik Kyllalyngkot.
Kat kum ka jingong u SP, ka Sutnga CHC ka khlem pyntip satia sha ki Pulit halor kane ka jingjia. Ia ki Pulit la pyntip da ki Pulit kiba don hapoh ka Police Booth jong ka Shillong Civil Hospital, kaba lam sha ka jingregister ia ka case.
U Kumar u pyntip ba ki Pulit kila sdang shaid shaid ia ka jingtohkit ban pynthikna ia ki jingshisha baroh bad kiei kiei kiba jia kiba lam sha kane ka jingiap.
 hadien ka jingiap jong uwei u briew namar ka jingkynnoh pynbthei bomb dynamite ha kawei ka par dewiong ha East Jaintia Hills.){kind=link}