Shillong, Rymphang 25 : U Symbud Myntri Rangbah ka kam pynroi sor Bah Sniawbhalang Dhar ha ka sngi Ba-ar ula pyntip ba ka Sorkar kam shym la pynjlan kai ia ka por hynrei kala kut jingmut hok ban pyndep noh ia ka jingpynkynriah ia ki 342 tylli ki Longiing na Them Metor, Them Iew Mawlong kham kloi kat kaba lah.
Haba iakren bad ki lad pathai khubor, u Bah Sniawbha ula ong “Ngim shym la pynjlan ia ka por. Namar ba ka dei ka kam kaba la sahteng la bun bun snem kumta hashuwa ba ngin shim ia ka rai kaba khatduh, ngi donkam ia ka por ban pynbeit ha ka lynti kaba dei namar lada ka tuklar ka Iingkashari, kan nang kham jynjar shuh shuh. Kumta, ngi lah shimkhia ia kane ka bynta ban pynthikna ba ngin lah pynbeit shisyndon ia ka”.
“Ngim shym la pynjlan kai ia ka por hynrei ka dei ba ngim kwah ban shim rai kyrkieh. Watla ngi la shimpor hynrei ka dei na ka bynta ban pynbeit shsyndon ia ka bad kane ka dei kaba ngi kwah. Kam dei sati aba ngi sheptieng iano iano hynrei ka dei namar ba ngim lah ban shu bret ia ki kumto. Ngim shym iada iano iano ruh…” ula ong haba kular ba ka Sorkar kala shimkhia hakhmat eh ia kane ka kam.
U Symbud Myntri Rangbah ula pyntip ba kane ka kam kala don ha ka khep satang ban shu pyndep beit noh.
Halor ka jingtyrwa ban pan jaka shipai na ka bynta ban pynkynriah ia ki longiing na Them Metor, u Bah Sniawbha ula ong ba ka jingiakren ka dang iaid bad ka Defence Ministry.
“Namar kata, to ngin ia ap namar ka don jingiadei bad ka Sorkar Pdeng” ula ong.
