Shillong, Nohprah 18 : U Myntri Rangbah Duh ka Ri u Narendra Modi hynne ka sngi U Blei ula ong ba ka Sorkar jong u-ka National Democratic Alliance (NDA) kala kynshew haduh T. 7 lak klur ha ki jingtei jong ki kam pynroi ha ka thain Shatei Lam Mihngi haba nujor bad ka jingkynshew ba tang T. 2 lak klur naduh ba ka Ri ka ioh ia ka jinglaitluid.
Haba kren ha ka jingrakhe jubili ksiar ka North Eastern Council (NEC) ha madan Jawaharlal Nehru Stadium (Polo), Shillong, u Myntri Rangbah ula ong ba ki jaka khappud jong ka thain ym tang ba kin long kiba shngain hynrei yn pynlong ruh ia ki kum ki khyrdop ha ka khaii ka pateng bad ki Ri kiba marjan.
Ula ong ruh ba un sa pynlong ia ki Shnong ha Khappud kiba khlain bad ba don ia baroh ki jingdonkam bad ki lad pyniasoh.
U Myntri Rangbah ula ong b aka thain Shatei Lam Mihngi ka dei ka khyrdop ka Ri India sha ki Ri ka South-East Asia bad ka lah ban long ka jaka pdeng ka roi ka par jong ka thain baroh kawei bad ban pynurlong ia kane ka lad ka kabu jong ka thain, ki kam kila iaid ha kaba pyntrei ia ki project kum ka surok Indian-Myanmar-Thailand trilateral highway bad ka Agartala-Akhaura rail project.
U Myntri Rangbah ula kdew ruh ba ka Sorkar kala jam palat ia ka jingpynkylla ia ka ‘Look East’ Policy sha ka ‘Act East’ bad mynta kane ka policy kala long ‘Act Fast for Northeast’ bad ‘Act First for Northeast’.
Haba kdew ia ka jingjop ha kaban wanrah ia ka jingsuk hapoh ka thain, u Modi ula ong ba ka Sorkar Pdeng kala iasoi ia shibun ki soskular iasuk, ka jingpynbeit ia u pud u sam jong ki Jylla ruh kala leh bad kala duna bha ha ka jingdon ki kam pyntriem jong ki kynhun kiengatiar.
Haba pynbna ba baroh ki jait jingdonkam jong ka thain Shatei Lam Mihngi yn sa pynurlong, u Myntri Rangbah Duh ula ong ba da ka jingwanrah ia ka jingsuk hapoh ka thain, ka Sorkar Pdeng kan sa weng noh ia ka Armed Forces (Special Powers) Act na kiba bun ki jaka ka thain.
Haba pynpaw ba katba ka World CUP ka FIFA ka dang iaid ha Doha (Qatar) ma u pat ula iadonlang bad ki riewieid phutbol ha madan phutbol ha Polo, u Modi ula ong “Nga pyntip sha phi ba ka Sorkar kala wanrah ia ka Sports University ba nyngkong eh ka India ka ban don ha ka thain Shatei Lam Mihngi (Manipur) bad ka jingpynkhreh ban wanrah sa palat 90 tylli ki project ka dang iaid shakhmat.
U Myntri Rangbah ula plie bad buh mawnongrim ia kiba bun tylli ki project ba kot palat T. 2450 klur.
Kine ki project ki kynthup ia ki mobile towers, new Campus ka IIM Shillong ha Umsawli, Shillong – Diengpasoh Highways, Spawn Laboratory ha Mushroom Development Center, Integrated Beekeeping Development Centre bad 21 tylli ki Hindi libraries ka Mizoram, Manipur, Tripura bad Assam.
