Nongpoh, Naitung 18 : Da ka mynsiem ba shynrang ban buddien ia ki mat ki jura jong ka jaidbynriew khamtam ban shakri ia ka district Ri Bhoi, ki samla ka Ri Bhoi District ki la thaw ia ka kynhun shakri paidbah kaba la jer kyrteng kum ka Ri Bhoi People’s Council.
Ia kane ka kynhun la pynbna ha ka jingialang kynmaw burom ia ka lyngkhuh sngi iap ba 188 snem jong u Tirot Sing Syiem kaba la pynlong ha ka sngi Nyngkong ha Parish Hall, Nongpoh.
Ki riew rangbah kiba la iadonlang ban sakhi ia ka jingmih kane ka kynhun ki kynthup ia u Chief Executive Member barim ka KHADC Bah Rangkynsai R. Makdoh, , Bah P. Syiem, Additional SP barim ka Ri Bhoi District, u Bah Najim Kharmalki, President ka Western Ri Bhoi Dorbar nalor kiwei kiwei ki riew rangbah lem bad palat spah ngut ki samla kiba la pynpaw ia ka jingangnud ban pyniasoh ha kane ka kynhun jong ka Ri Bhoi People’s Council.
Haba kren ha kane ka sngi, u Bah R.R Makdoh u la pynpaw ia ka jingkmen ban sakhi dalade ia ka mynsiem kaba shynrang jong ki khun samla kiba don ia ka mynsiem ban shakri ia la ki paidbah ka them Ri Bhoi District khamtam ban peit ruh ia ka bha ka miat jong ka imlang ka sahlang bad ban rad dyngkhong ia ki jingsniew jingsmeh nalor ki kam pynroi ba kum ka district ka dei hok ban ioh da ka jingiakhun ha ka lynti kaba shemphang bad ki bor ka sorkar jylla.
U la pynpaw ruh, ba ka them Ri Bhoi District ka la lah ban pynmih shibun ki nongialam kiba la noh synniang shikatdei eh ia ka imlang ka sahlang bad kiba la shakri ia ka bha ka miat, bad mynta ka la dei pat sa ka pali jong ki khun samla ban mih shakhmat ban tynrong lem ia ka jingkitkhlieh na ka bynta ka district ha kiba bun ki liang.
Ula kyntu pat ba kum ki samla kim dei ban shu shah pyngngop noh ha ki bor jong kane ka juk ne wat ha ki bor jong ki jingsniew kum ki jingdih buaid kiba lah ban pyntroin pynban ia ka lawei ka jong ki bad ka district hi baroh.
Hashwa ban pynlait paidbah ia u shap treikam (logo) jong ka Ri Bhoi People’s Council, u Bah RR Makdoh u la pynbna ruh ia ka kyrteng jong u Samla Jayson Lennox Nongrum kum u Convenor jong kane ka Council ha kaba la aiti pat ban bteng ia ki kam kum ka jingjied pat ia ka kynhun kaba pura bad ia ki nongkitkam jong kane ka Council.
Na ka liang u Samla Jayson Lennox Nongrum u la pynpaw ba ka nongrim ba la seng ia kane ka Council ka long ban peit ban khmih ia ka imlang ka sahlang jong ka them Ri Bhoi District ha kiba bun ki bynta ba kum ki samla ki angnud ban kyntiew ia ka district bad ban peit lang ia ka eh ka shon.
Ula bynrap ruh, ba ka jingthaw thymmai ia kane ka kynhun kam shem mut ban shu seng khlem da don ia ka nongrim hynrei kane ka Council kan sa pyni paidbah ia la ki kam ban shakri ia ka district hi baroh kawei.
U la pynpaw ruh, ba kane ka Council kan buddien ia kiba bun ki mat ki jura kiba ktah ia ka imlang ka sahlang bad ka jaidbynriew khamtam ban iai pynsawa ia ka sur jingdawa ia ka Inner Line Permit hapoh ka jylla, ka jingpyrshah ia ka lynti rel ha kane ka jylla kat bym pat lah ban wanrah ia ki ain kiba khlain ban tehlakam ia ka jingrung kynthlep ki mynder ri, ka mat halor ka jingbym iohkam iohjam ki khun samla, ka jingdonkam ia ki jaka sumar kiba paka hapoh kane ka district bad kiwei kiwei ki mat kiba ka Council hi kan sa pynpaw shen.
Pule ruh: Manipur: Wan kit sha NEIGRIHMS ia u samla ba mynsaw na ka jingther kuli
