Dimapur, Iaiong 21: Ka sorkar Nagaland ka la pynkhreh ban thaw da ka Joint Task Force na ka bynta ban pyntreikam pura ia ka Inner Line Permit (ILP) ka ban iarap ban ithuh ia ki nongshong shnong ki bym dei ki trai shnong ka jylla bad kumjuh na ka bynta kito kiba wan rung sha Dimapur hadien jong ka 21 tarik u Naiwieng 1979.
“Ki nongshong shnong ki bym dei ki trai shnong riewlum bad ki bym dei ki Naga kiba shong ba sah ha Dimapur lane kiba la wan rung sha kane ka jaka khaii pateng ba kongsan ka jylla hadien jong ka 21 tarik u Naiwieng 1979, kin hap ban don ia ka ILP,” ong u heh sorkar.
Lada kine ki nongshong shnong ki bym dei ki trai shnong kim don ia ka ILP, kin hap ban pynioh ia ki kot ki sla ba donkam na ki bor sorkar ba dei khmih lane nas ka oophis jong ki Deputy Commissioner hapoh ka 30 sngi, ong shuh shuh u heh sorkar.
Na ka liang u Deputy Commissioner ka Dimapur, u Sachin Jaiswal dang shen u la pynlong ia ka jingialang bad baroh ki kynhun kiba iadon bynta ha kaba ki la iamir jingmut halor ki kam kiba iadei bad ka ILP.La pynlong ia kane ka jingialang hadien ki jingmih khubor halor ka jingjur ka jingwan tuid ki nongwan buhai shnong beain kiba shong ba sah ha Dimapur.
U Deputy Commissioner u la bthah ia ki heh sorkar ka district kumjuh ia ki heh pulit ba kin aijingtip ha kaba iadei bad ki nongshong shnong ki bym dei ki trai shnong kiba shong ba sah ha Dimapur district naduh ka 21 tarik u Naiwieng 1979 ba ki dei ban don ia ka ILP, bad kino kino ki briew kiba iaid lyngba ka Dimapur kum ki nongleit nongwan (passenger) sha kiwei pat ki jylla ki dei ban don ia ki tiket kiba biang nalor kiwei pat ki kot ki sla ba donkam.
Ia ka ILP la pyntreikam ha ka jylla Arunachal Pradesh, Nagaland bad Mizoram.Ka jingthmu ba kongsan halor ka jingpyntreikam ia ka ILP system ka long ban tehlakam ha kasba iadei bad kiwei pat ki nongshong shnong jong ka ri India hapoh kine ki jylla khnang ban iada ia ki trai shnong.Ki lad jingiada ki kynthup ruh ha kaba iadei bad ki hok jong ki trai shnong ha kaba iadei bad ki jaka puta, ki kam ki jam bad kiwei pat ki bynta.
